Svitova rada Rusyniv proty ukrajiňskoho zakona o jazŷku

V subotu 18-ho maja 2019-ho roku prochodylo 7-me zasidaňa Svitovoj radŷ Rusyniv, vŷkonnoho organu Svitovoho kongresu Rusyniv v medžikongresovim periodi. Členove radŷ strityly s’a v Starij Ľubovni.
Predstavyteli čleňskŷch deržav kongresu zapodivaly s’a pryhotovliňamy na XV. Svitovŷj kongres Rusyniv i IX. Svitovŷj forum rusyňskoj molodežy, kotrŷ tot rik buduť prochodyty v Ľubovňaňskŷch kupeľach v dňach 4-ho až 7-ho jula. No Svitova rada rišŷla i aktualnŷ problemŷ.

Zakon je diskriminačnŷj, situacija Rusyniv bude skladniša
Svitova rada Rusyniv počas zasidaňa obhovoryla i novŷj ukrajins’kŷj Zakon o funkcionovaňu ukrajiňskoho jazŷka jak deržavnoho jazŷka, kotrŷj 25-ho apriľa 2019-ho roku schvalyla Ver’chovna rada Ukrajinŷ i takoj potim ho pidpysav vtohdŷšnij prezident Petro Porošenko.

Jak s’a pyše v zapysi zo zasidaňa radŷ, zakon „diskriminuje ostatni jazŷkŷ narodnostnŷch menšŷn, kotrŷ ne buduť hodnŷ svoju narodnosť rozvyvaty.“

Svitova rada na osnovi proštudovaňa predmetnoho zakona skonštatovala, že „zakon je diskriminačnŷj i robyť išči skladnišov už i tak skladnu situaciju nepryznanoj narodnosty Rusyniv. Ukrajina pidpysala Evropsku chartu regionalnŷch abo menšŷnovŷch jazŷkiv i jak signatar’ovy bŷ jij peršor’ado malo ity o dotrymovaňa ustanovliň chartŷ, ale pryjaťom zakona ide v druhu storonu.“

Rychtujuť protestne pysmo
Učastnŷ zasidaňa s’a zhodly na tim, že napyšuť odnosno toho zakona protestne pysmo. Malo bŷ bŷty zahanne na Radu Evropŷ i deputatovy Narodnoj radŷ Slovac’koj republikŷ i jednočasno členovy zahraničnoho vŷboru v parlemnti Ľubošovy Blahovy.

Svitova rada Rusyniv choče v pysmi zvernuty uvahu na „pr’amovaňa zakona proty všŷktŷch narodnostej i vlastnŷch žŷteliv.“ Predstavyteli Rusyniv tŷm choťať apelovaty, žebŷ zrobyty micnŷj tysk na vladu Ukrajinŷ, kotra bŷ mala dotrymovaty zakľučiňa Evropskoj chartŷ regionalnŷch abo menšŷnovŷch jazŷkiv.

PETRO MEDVІĎ

Žridlo:
http://www.lem.fm/svitova-rada-rusiniv-proti-ukrayinskogo-zakona-o-yazyiku/