V Medžilabirc’ach SRR odsvjatkovala Svitovŷj deň Rusyniv

V Medžilabirc’ach SRR odsvjatkovala Svitovŷj deň Rusyniv
24.03.2019

Svitova rada Rusyniv vjedno iz Rusyňskov obrodov na Sloveňsku i mistom Medžilabirci dňa 23-ho marca 2019-ho roku zorganizovala v Medžilabirc’ach svjatočnu akademiju, kotrov sobi Rusynŷ prypomjanuly 28-mu ričnic’u od prochodžiňa 1-ho Svitvoho kongresu Rusyniv a vjedno z tŷm toržestvovaly i Svitoŷj deň Rusyniv, kotrŷj bŷv schvalenŷj jak raz na tot deň.
Akademija začala v popolidňajšŷch hodynach pry pamjatnij tabli, kotra je na Domi kulturŷ v Medžilabirc’ach, značiť budovi, de kongres u 1991-im roci prochodyv. Na podiji braly učasť Rusynŷ iz Slovakiji, Poľšči, Maďar’ska, Rumuniji i Serbiji.

Spomynaly i v kongresovij sali
„Zašly s’me i do salŷ, de prochodyv peršŷj kongres, što bŷlo barz emotivne. Vŷšly s’me na scenu i predstavľovaly sobi, jak to mohlo vŷzeraty, keď tota sala bŷla povna až tak, že i na garadičach sydily ľudy,“ poviv predseda Svitovoj radŷ Rusyniv Štefan Ľavynec’’.

„Pryčin na našu striču v Medžilabirc’ach bŷlo vece. Najvažnišov bŷlo, že svjatkujeme Svitovŷj deň Rusyniv, kotrŷj s’me schvalyly na ostatnim kongresi (v Osijeku, pozn. red.) na 23-ho marca. Dumam, že s’me ceremoniju kolo pamjatnoj tablŷ provely dostojno,“ prodovžovav Ľavynec’.

Na Misťskim ur’adi s’a tak samo spomynalo i na kongres. Medži inšŷma na totŷ dni, 22-ŷj i 23-ŷj marec 1991-ho roku, spomynav i člen Svitovoj radŷ Rusyniv za Poľšču Andrij Kopča, učastnyk peršhoho kongresu, kotrŷj v tŷch dňach pryhotovľuje s’a i na svjatkovaňa okruhloho jubileju – 30-oj ričnici zasnovaňa organizaciji Stovaryšŷňa Lemkiv u Poľšči, jakoj je od vŷnyknuťa predsedom.

Obhovoryly s’a i sučasnŷ problemŷ
Na akademiju pryšov i predseda Združiňa inteligenciji Rusyniv Sloveňska Jan Lypyňskŷj, kotrŷj je jednočasno i predsedom Okruhloho stola Rusyniv Sloveňska. Tot učastnŷm odprezentovav najsvižišŷ rezultatŷ robotŷ združiňa – prynis vkazaty i odprezentovav Galeriju osobnostej rusyňskoj medživojnovoj istoriji, film V chapadlach micnŷch svita. Bytva pidkarpaťskŷch Rusyniv o misce v rodyni evropskŷch narodiv i najnovišu publikaciju Čechoslovac’kŷj svit v Karpatach, kotra, jak poviv Lypyňskŷj, maje bŷty muzejom v knyžci.

„Maly s’me i duže interesnu komunikaciju o tim, jak vydyme problemŷ rusynstva v teperšinim časi,“ poviv predseda Svitovoj radŷ Ľavynec’, kotrŷj v subotu vŷstupyv iz svojov lekcijov pid nazvov Rusynŷ svita. V nij okrim inšoho spomynav i travmu, kotru v sobi rusyňska istorija nese, i to vjazniňa Rusyniv u Talerhofi i Terezini, ale i procesŷ asimilaciji ci ukrajinizaciji. Jak raz totŷ problemŷ vŷklykaly dovšu diskusiju. Jednŷm iz jij rezultativ bŷ malo bŷty i pidporne pysmo od Svitovoj radŷ Rusyniv pro Osnovnu školu z gimnazijov i študenťskŷm domovom Petro Kuzmjak v Rus’kim Keresturi, jaka s’a v ostatnim časi distala pid tysk, žebŷ na osnovnij školi učilo s’a i po serbskŷ. Osnovna škola, kotra pyše 265-ŷj rik svojoj istoriji maje doteper’ lem rusyňskŷ klasŷ. Svitova rada Rusyniv bŷ mala napysaty psymo, v kotrim vŷrazyť, pidporu rusyňskij inštituciji, jaka je jedyna svojoj sortŷ u sviti, i zato je barz važne to, jaka bude jij dalša doľa.

Po večeri slidovalo išči zasidaňa Svitovoj radŷ Rusyniv. Na nim s’a maly obhovohoryty dalšŷ aktualnŷ problemŷ i pryhotovliňa na Svitovŷj kongres Rusyniv, kotrŷj tot rik bude prochodyty na Slovakiji.

PETRO MEDVІĎ

Žridlo:
http://www.lem.fm/v-medzhilabirtsyah-srr-odsvyatkovala-svitovyiy-den-rusiniv/
LEM.FM (Lemkowyna, Poľsko)
Naspäť na aktuality