"Дом там дзе розум”

 

На дзень кед пред двацец роками отримана Сновательна скупштина Рускей матки - 28. децембра у Велькей сали Дома култури Руски Керестур, вчера на истим месце отримана Шветочна скупштина РМ.  Попри членох и орґанох РМ, вчерайшей програми означованя ювилею присуствовали представителє дзепоєдних наших институцийох, дзепоєдни члени Националного совиту Руснацох, алє и госци з иножемства - представителє и предсидателє русинских орґанизацийох, котри источасно и члени Шветовей ради Руснацох/Русинох/Лемкох.

- Руска матка, дружтвена орґанизация бачванско-сримских Руснацох основана у чаше кед ше за свой идентитет Руснаци мушели ознова почац бориц на найозбильнєйши способ. Кед витворйованя националних правох на очуванє и розвой власного идентитету пробовали и почали гамовац зоз шицких бокох. Кед загрожовали и блїзки родзини, преглашуюци нас за своїх. За исте и за субетнос - гварел вчера у своїм реферату з нагоди ювилею предсидатель РМ и Шветовей ради РРЛ Дюра Папуґа.
 

Папуґа наглашел же мото Сновательней скупштини РМ бул "Дом там дзе розум", визначел же основни цилї и задатки РМ були и остали очуванє идентитету Руснацох и витворйованє правох и интересох у обласци пестованя и розвою власного, руского язика; у образованю, култури, у информованю, у литератури и уметносцох.
 

- У прешлих 20 рокох, у зложених, дзекеди и нєприємних часових периодох, РМ витворйовала свойо основни цилї, а дотерашнї резултати активносци членох РМ, орґанизованих у месних орґанизацийох у Руским Керестуре, Кули, Коцуре, Вербаше и Городскей орґанизациї у Новим Садзе - потвердзую потребу єй постояня и роботи и у наступним периодзе - гварел Папуґа.
 

Папуґа у шветочним реферату начишлєл и дотерашнї найзначнєйши активносци Матки, наглашуюци же РМ була снователь и учашнїк на шицких дотерашнїх дзешец Шветових конґресох РРЛ, а два орґанизовани и у Руским Керестуре - Треци, 1995. року и остатнї, Дзешати, котри заєднїцки орґанизовани у двох сушедних державох - Сербиї и Горватскей, понеже єден дзень отримани у Петровцох.
 

Визначел и активносци Шветовей ради РРЛ, котрей є на чолє од прешлого року, дзе найзначнєйше же у шицких жемох дзе жию, почало означованє дньох Руснацох, а у наступним периодзе, найзначнєйше будзе пририхтованє за пописи жительства.
 

Тиж так, Папуґа наглашел и заєднїцки активносци у обласци информованя, прейґ Асоцияциї русинских новинарох (АРУН), котра основана влєце того року, а наявел и снованє Асоцияциї русинских подобових творительох.
 

На концу реферату, Дюра Папуґа наглашел же Руснаци/Русини сцу буц лєм тото цо су, а Руска матка им у тим може помогнуц. Бо, як гварел, "руски розум то руски дом". 
 

зам