Покраїна приклад толеранциї на дїлу

З нагоди Медзинародного дня толеранциї, вчера у Скупштини АП Войводини отримана Конференция з назву “Европа меншинох: меншински права як людски права”.

Конференцию отворел предсидатель Скупштини АП Войводини Иштван Пастор и у своєй бешеди о толеранциї гварел же за толеранцию важне мац и добре домашнє воспитанє, односно спознанє о тим же зме нє шицки исти, цо нє шме буц препреченє за творенє нормалних одношеньох и медзисобне прилапйованє.

- Зоз шейсц язиками, кельо у урядовим хаюснованю у Скупштини АПВ, наша Покраїна такой за Скупштини Европскей униї, и ми можеме буц приклад велїм европским державом о толеранциї на дїлу - гварел Пастор, оценююци и же Европа простор меншинох.

У привитней бешеди, предсидатель Народней скупштини Републики Сербиї Небойша Стефанович гварел же гражданє Сербиї каждодньово муша буц пошвецени почитованю меншинских правох, же би у тей обласци єдного дня насправди були ровноправни член ЕУ, а наглашел же по питаню правох меншинох и Сербия и Войводина напредовали.

Додал же гоч Сербия ма правни и институцийни рамики процив дискриминациї, толерантносц дружтва у хторим ше почитує розличносци ше муши унапредзовац, а шицки гражданє маю право нєзавадзаюцо витворйовац свойо права.

Присутним бешедовали и госци з иножмества - заменїк шефа Делеґациї ЕУ у Сербиї Адриано Мартинс, шеф Оддзелєня за демократизацию Мисиї ОЕБС у Сербиї Ян Линебурґ, посланїк у Европским парламенту з Мадярскей, з ґрупациї „Европских социялистох и демократох” Чаба Табайди, котри надихнуто бешедовюал о толеранциї медзи народами у Европи и Кинґа Ґал, тиж посланїца у Европским парламенту з Мадярскей, алє з Ґрупациї „Европска народна партия”.

У часци наволаней “Уставно-правни рамик положеня меншинских заєднїцох у Сербиї” участвовали подпредсидатель Влади АП Войводини и покраїнски секретар за образованє, управу и национални заєднїци Андор Дели, директор Канцелариї за людски и меншински права Влади Републики Сербиї Душан Иґнятович, заменїк Защитнїка гражданох задлужени за питаня з обласци правох меншинох др Ґоран Башич и Покраїнска омбудсманка Анико Мушкиня Гайнрих.

На Конференциї участвовали и представителє националних совитох (НС)  националних меншинох у Сербиї и даєдних орґанизацийох националних заєднїцох, медзи нїма и НС Руснацох и дзепоєдних наших здруженьох.

Конференция отримана под покровительством Скупштини АП Войводини и Интерґрупи за традицийни заєднїци и язики у Европским парламенту.

(конєц) дюв/зам