1.Festival kultury Rusýniv Slovenska u Svýdnýku i joho hlavne poslaňa

V dňoch 20.-26. maja 2013 bude u Svýdnýku 1.Festival kultury Rusýniv Slovenska. Dumku začaty organizuvatý festival u Svýdnýku považujeme za bonus, za ružu daruvanu Rusýnam ku 20. vyroču založiňa Okresnoj organizaciji Rusynskoj obrody u Svýdnýku. Založena byla 9.12.1992 v kulturnim domi. Zamer organizuvatý rusýnskyj festival sja zrodýv za 10 mynut prý slavnostnim posýdžini po kulturnim programi oslav 20-ho ročnýka koncertu Viflejemskyj večur i vyroča založiňa Rusynskoj obrody u Svýdnýku, presni o 20 rokiv pizniše - 9.12.2012. Otcjamy toj dumky byly Rusýny,  funkcionare mista Svýdnýk, funkcionare Obvodnoho urjadu u Svýdnýku, poslanci mista Svýdnýk i parlamentu SR aj funkcionare OO RO u Svýdnýku. 

Holovnym organizatorom festivalu je Okresna organizacija Rusýnskoj obrody u Svýdnýku. Spoluorganizatoramy sut Misto Svýdnýk i Piddukľanskyj osvitnij center u Svýdnýku. Predseda VUC v Prešovi už dal suhlas, že bude trýmatý patronat nad tym rusýnskym festivalom.  „Pidryvače“ z rjadiv tzv. Rusýniv-Ukrajinciv, abo lipše povidane, z rjadiv ukrajinizatoriv Rusýniv,  sut z toho mocno prekvapeny, že što to sja z Rusýnamý u Svýdnýku dije. Majut važny obavy, že straťat u Svýdnýku svoji doteperišni pozyciji  a može sja statý, že Svýdnýčane  pidut svojom rusýnskom drahom i perestanut rešpektuvaty ukrajinizačny bludy  o tim, že Rusýny sut Ukrajinci, abo iši horše Rusýny – Ukrajinci. A za učelom dezorientaciji rusýnskoho obyvateľstva, nelem u Svýdnýku, ale i na Slovensku, verejni  sja prosjat: To treba u Svýdnýku dva festivaly? A što je take zvlaštne na tim festývali? Budut dajaky novy subory, što ne sut na ukrajinskim festivali? A što to za rusýnskyj festival, ked tam vystupuje slovenskyj profesionalnyj subor Lučnica?

Naša rusýnska odpoviď ukrajinizatoram Rusýniv na toty pidrývačny voprosy  je  nasledovna:  Festival kultury Rusýniv Slovenska u Svýdnýku je potrebnyj Rusýnam zato, žeby Rusýny dalý na znamosť cýlomu svitu, že u Svýdnýku  žyjut jak avtochtonne obyvateľstvo Rusýny a ne Ukrajinci a už vobec ne dajaky vydumany Rusýny-Ukrajinci. Taky tu nýkoly ne žyly, aný ne žyjut. Že Rusýny u Svýdnýku  majut svoju istoriju, materialnu kulturu, kotru dokumentuje skanzen nad amfiteatrom, kotryj dočasno iši nese čudžu nazvu –ukrajinskyj, ale už nedovho, bo spravnyj nazov maje bytý – rusýnskyj,  zato   sidlo rusýnskoho muzeja maje bytý u Svýdnýku, bo všytko v muzeji u Svýdnýku je lem rusýnske kulturne dedičstvo. 

Rusýny u Svýdnýku majut svoji rusýnsky spivanky, tanci, zvýký, kroji, rusýnskýj kodifikuvanyj jazyk. Zato treba u Svýdnýku dva festivaly,  žeby i tzv. vydumany Rusýny-Ukrajinci, kotry povidajut že jich materýnskyj jazyk je ukrajinskyj, Svýdnýčanam ukazalý svoju ukrajinsku kulturu a nechvalýlý sja nam  kulturom, kotra je naša rusýnska, i žeby sobi ne prýsvojuvalý kulturne dedičstvo Rusýniv. Naj sja tzv. Rusýny-Ukrajinci  u Svýdnýku za svoju ukrajinsku kulturu, ne hanbľat.  Zato treba u Svýdnu dva festivaly. Zvlaštne na rusýnskim  festivali ne je nič, lem tot festival sja od ukajinskoho bude odlišuvatý tym, že bude konferuvanyj po rusýnsky a ne po ukrajinsky a rusýnsky spivanký i tanci i tot skanzen nad amfiteatrom, bude konferencieramý vyhološuvanyj za rusýnskyj i po rusýnsky, bo to je naša rusýnska kultura.

Na rusýnskim festivali v konferencierskim texti bude ľuďom  povidana  pravda o kulturi, kotra sja bude prezentuvaty na javisku amfiteatra. Na ukrajinskim festivali sja furt povidat cyganstvo, bo o rusýnskych spivankach, tancjach i krojach povidaly  že sut ukrajinsky, abo iši horše rusýnsko-ukrajinsky. Take ne je nýgde na sviti.  Novy subory v programi ne budut, budut lem taky, jak bylý i na mýnulych festivaloch – ukajinskych, lem s tym rozdilom že my povime pravdu, že toty subory, spivanky, tanci, kroji i skanzen nad amfiteatrom sut rusýnskym kulturnym dedičstvom i ne možut bytý prezentuvany nýkym jak kultura dajakoho inšoho narodu.

Lučnica je slovenskyj špičkovyj reprezentatývnyj subor a my žyjeme na Slovensku, tak zme pozvaly Lučnicu jak hosťa  namisto Zakarpatskoho ukrajinskoho choru, abo inšoho ukrajinskoho suboru, bo my nezme Ukrajinci. Tak zato Lučnica.

V programi festivalu sut  i  rusýnsky prekvapiňa, novoty, jaky doteper na festivali u Svýdnýku ne bylý, ale toto prozradžuvatý iši ne budeme...                  

Jan Kalýňak, Svýdnýk