Karpatski Rusini jeden nerozdzeľivi narod

Карпатски Русини єден нєроздзелїви народ
Карпатски Русини єден нєроздзелїви народ. То потвердзує и тогорочне Интерреґионалне стретнуце Русинох на гори Кременєц, алє и вельочислени заєднїцки акциї шицких Русинох, орґанизованих у рамикох Шветового Конґресу Русинох/Руснацох/Лемкох (РРЛ) - сообщую учашнїки Интерреґионалного стретнуца Русинох на гори Кременєц 2012 и члени Шветовей ради РРЛ.

Стретнуце орґанизоване 13. и 14. юлия, на тромеджи Словацкей, Польскей и України, єй Закарпатскей обласци, участвовали на нїм млади и други зоз Словацкей, Сербиї, Ческей и Подкарпатя, а орґанизую их Шветови конґрес Руснацох/Русинох/Лемкох (ШК РРЛ) и Шветови форум русинскей младежи (ШФРМ). Попри предсидателя Шветовей ради (ШР) РРЛ Дюру Папуґу, на Стретнуцу були и члени ШР, з України Микола Бобинец и зоз Словацкей Владимир Противняк.

Спред Форуму младих Рускей матки на Стретнуцу участвовала Александра Живкович з Руского Керестура, а спред Рускей матки и єй подпредсидатель Миломир Шайтош з Нового Саду, та  Славко Пап, професор физичного у керестурскей Школи.

- Нєшка Русини урядово припознати и витворюю свойо права у обласцох просвити, култури, информованя и службеного хаснованя руского язика у Польскей, Ческей, Словацкей, Мадярскей, Румуниї, як и у Сербиї и Горватскей, а од 3. юлия 2012. року, зоз Законом о державним и реґионалних, або меншинских язикох у України, хтори вигласала Верховна Рада України, тота можлївосц и потреба установена и на Подкарпатю, односно у Закарпатскей административней державней обласци и у цалей України - гвари ше у Сообщеню з того Стретнуца.

- Историйна подїя хтора ше случела 3. юлия 2012. року з прилапйованьом Закона о язикох у України, доказує нєзастановююци процес припознаня историйного права Русинох як єдного нєроздзелївого народу и у України.

- И того року зме у векшини штреднєевропских державох у хторих жию Русини/Руснаци/Лемки, на прикладни способ означели днї Русинох, а на Подкарпатю то поробиме другого викенду у октобре того року, кеди у Мукачеве заєднїцки орґанизуєме перши Медзинародни дзень русинскей култури и отримаме Сновательну скупштину Асоцияциї русинских подобових творительох - АРТПОТ.

- Наступни, 12. ШК РРЛ отримаме у юнию 2013. року у Мукачеве и Сваляви на Подкарпатю, у України. Карпатских Русинох вецей нїхто нїґда нє роздзелї, нє подзелї, нє повадзи, бо то єден нєроздзелїви народ -поведзене на концу Сообщеня учашнїкох Стретнуца на гори Кременєц и ШР РРЛ.

(конєц) зам