Dopis optštinom o vikladaňu simboloch ruskej menšiny

Допис општином о викладаню символох рускей меншини

Застава Руснацох у Сербиї
До шицких локалних самоуправох у хторих ше службено хаснує и руски язик, Национални совит Руснацох нєдавно послал допис з хторим општински управи здогадує же, на основи Закона о локалней самоуправи, попри державних, маю обовязку викладац и прилапени национални символи рускей националней меншини у Сербиї.
 
Допис иницировал Одбор за службене хаснованє язика и писма Националного совиту, а послати є до општинох Кула, Вербас, Жабель, Шид и Бачка Тополя и до Городу Нови Сад. У нїм спозорене и на член Уставу Републики Сербиї, у хторим стої же национални меншини маю право на хаснованє своїх символох, як и на член Закона о защити правох и шлєбодох националних меншинох, спрам хторого национални совити маю право принєсц символи єдней националней меншини, та их принєсол и наш совит.
 
Одбор за службене хаснованє язика и писма модлї спомнути локални самоуправи же би го писмено поинформовали чи ше спомнути законски одредби запровадзує у пракси, як и хтори мири буду превжати кед же єст препущеня.
 
автор:  зам