90-ročňica informovaňa po rusnacky

Означена 90-рочнїца информованя по руски, 50-рочнїци ”Литературного слова” и представени нови випатрунок новинох
 
Отримана шветочносци з нагоди рочнїцох нашого информованя   Отримана шветочносци з нагоди рочнїцох нашого информованя
 
 У будинку Влади АП Войводини у Новим Садзе, вчера, 12. юния, отримана шветочносц з нагоди 90-рочнїци друкованого информованя по руски, 50-рочнїци "Литературного слова" и промоциї нового формату тижньових новинох "Руске слово". Програму отворел єй домашнї - подпредсидатель Влади АПВ и покраїнски секретар за културу и явне информованє Славиша Ґруїч.

Програму водзела директорка НВУ "Руске слово" Мартица Тамаш, котра и подробнєйше бешедовала о ювилейох, терашнєй роботи и промоциї нового формату новинох. Як гварела, новини "Руске слово" виходза од 15. юния 1945. року, того року полня 69. роки виходзеня, а операю ше на традицию "Руских новинох", хтори виходзели од 4. децембра 1924. року по початок Другей шветовей войни и обявени коло 800 числа.

"Литературне слово" мешачни литературни додаток у новинох "Руске слово" и од 1964. року дотераз обявени вецей як 600 числа, дзе ше розвивали ґенерациї руских писательох и творчосц на руским язику.

Пред 70-рочнїцу виходзеня, новини "Руске слово" тераз, у юнию, починаю виходзиц на новим, сучаснєйшим формату. Место Ц3, нови формат А4, папер 80-ґрамски офсетни и шицки боки у фарби.

Снователь новинох „Руске слово" тераз Национални совит Руснацох, а финансиєр Покраїнски секретарият за културу и явне информованє, так же и ювилей повинчовали и чолнїки тих инситуцийох.

- Медиї єден зоз слупох Покраїни. Тераз „Руске слово" достава нови формат, розвива ше и доприноши медзикултуралносци, бо гоч у Войводини єст розлични язики, ми ше добре розумиме - наглашел Ґруїч.

Предсидатель Националного совиту Руснацох Славко Рац гварел же чесц буц на чолє националней заєднїци хтора ма 90 роки традициї друкованого слова.

- Новини муша буц очи народа, а наш народ добре видзи напредок. Жадам же бизме тирвали ище вельо роки и же би нашо дзеци научели свою бешеду, бо нам то будучносц - акцентовал Рац.

На шветочносци бешедовал и предсидатель Управного одбору Асоцияциї медийох Зоран Секулич, котри гварел же є горди же "Руске слово", гоч є наймладши член тей асоцияциї, алє по старосци з длугоку традицию, и у нєшкайших кризних часох заш лєм уклада до свойого розвою и инвестицийох.

автор:  мгк