U Mikloševcoch preslaveni Dzeň Rusnacoch

У Миклошевцох преславени Дзень Руснацох
Женска шпивацка ґрупа миклошевского КУД (у ґалериї госци, з програми и промоциї кнїжки)    Женска шпивацка ґрупа миклошевского КУД (у ґалериї госци, з програми и промоциї кнїжки)
 
Дзень Руснацох у Миклошевцох преславени вовторок, 10. юния зоз Шветочну академию у Дружтвеним доме, а у орґанизациї Ради рускей националней меншини Општини Томповци, у сотруднїцтве з домашнїм КУД "Яким Ґовля", Подручну школу и Здруженьом женох.

Як висланїца жупана Божи Ґалича, на Академиї присуствовала секретарка Жупанийскей скупштини Ядранка Ґолубич, потим началнїк Општини Томповци Томислав Паненич, його заменїк Здравко Звонарич, декан сримски и парох миклошевски о. Яким Симунович, заступнїк у Совиту за национални меншини Републики Горватскей Звонко Костелник, Представителька рускей националней меншини Осиєцко-бараньскей жупаниї Агнетка Костелник Балатинац, заменїк предсидателя Координациї радох рускей националней меншини Борис Бучко и други госци.

Шветочносц почала з интонованьом державней химни и шветочней писнї "Браца Русини", а потим присутних привитал предсидатель Општинскей ради и доначалнїк зоз шорох рускей националней меншини Мирослав Лїкар, котри подзековал госцом же пришли возвелїчац тото швето. З пригоднима словами швето повинчовали и Ядранка Ґолубич, о. Яким Симунович, Звонко Костелник и Томислав Паненич.

У першей часци програми члени рецитаторскей секциї КУД "Яким Ґовля" виведли рецитал "По наших плодох буду нас познац", преткани зоз шпиванками домашнєй Женскей шпивацкей ґрупи.

Националне швето була нагода здогаднуц ше на значни рочнїци - 140 роки як преглашена "Обща народна школа", 55 роки Матичней школи Чаковци и 150 роки народзеня основноположнїка културней и просвитней дїялносци у Миклошевцох, учителя Якима Костелника.

Друга часц програми предлужена з представяньом дзевятей кнїжки Дюру Лїкара "Жвератко нашей младосци", у виданю Основней школи Чаковци. Уводне слово о кнїжки дала Ксения Лїкар мл., рецензию Мариї Папуґи пречитала учителька Леся Мудри, а о єй змисту бешедовал автор. Тоту часц програми звеличали школяре нїзших класох Подручней школи котри виучую руски язик з виводзеньом драмскей слички "Дїдо и цвикла" и читаньом власних литературних творох, як и бувших школярох.

Автор кнїшки Дюра лїкар подзековал шицким сотруднїком котри помогли у наставаню кнїжки и подзелєл прикладнїки госцом и публики.

Конферансу водзели школяре Паула Поточки и Иван Лїкар, а Здруженє женох пририхтало виставу ручних роботох и руского народного облєчива. После програми пририхтани коктел за шицких присутних.

автор:  клї