AD: V Humennom po 40 rokoch končí ukrajinská národnostná škola

Хто винен?

В русинскых інтернетовых новинках Голосы єм чітав задумчівый і аналізаторскый чланок Петра Медвідя з назвом «Кому ся тым помогло?» ( http://www.lem.fm/komu-sya-tyim-pomoglo/ ).  На чланок є дана ай єдна реакція од писателя Лаборец. В русинскых  інтернетовых новинках  Русин є лем перебрана статя з новинок Корзар ( http://www.rusyn.sk/v-humennom-po-40-rokoch-konci-ukrajinska-narodnostna-skola ) о тім, же в Гуменнім зрушыли народностну українску закладну школу. Новинкы Русин  неаналізуют ситуацію з погляду русинской ані з погляду українской народносной політикы. Также погляд редактора новинок Русин на вец є нам незнамый, што є на шкоду веці. Проблем с погляду розвоя русинского школства є моцно важный. Кед выходжу сам з чланку в Русині о Гуменскій українскій школі, так хапу то так,  же українска народностна меншынова  школа в Гуменнім немат подпору у родичів, зато мала довогодобый проблем,  а зато  є довгодобо фінаначно в Гуменнім стратова,  а зато  была посланцями одклепнута на ліквідацію. Ретязова реакція. 

 

Тот чланок як кебы с тов ліквідаціёв українской школы в Гуменнім сугласив і тішыв ся с той ліквідації. Также с погляду русинства уж немаме што аналізувати коло цітації проблему од Русина. Але в скуточності проблем в Гуменнім є. Барс добрі тот проблем одгалили русинскы інтернетовы новинкы Голосы.  Зато хочу похвалити Петра Медвідя, за ёго справный новинарскый приступ і за справодливе годночіня  того, же школу в Гуменнім зодповідны люде незахранили. Але заровень ся треба задумати ай над словами писателя Лаборец в новинках Голосы, де реаґує на статю Петра Медвідя і повідат, же проти школі в Гуменнім броїла політична векшына в містскім парламенті  а же нихто непоміг школі, над котров вісів Демоклов меч, а зато же буде плано з нами, Русинами, кед зме ся так плано заховали ку тій українскій  школі в Гуменнім.   

 

Мій погляд на даный проблем є такый. Українску  народностну школу в Гуменнім в першім ряді мав хранити Союз Русинів-Українців Словенска. Председом того Союзу є Петро Сокол. Кед Союз має в назві ай слово Русинів, так што бранило Петрові Соколові, жебы ся засадив о то, жебы ся в школі учів ай русинскый язык? Ніч му небранило. Як  бы скуточні тот Союз мав зауєм о Русинів, так бы  ЗРУС-овці, за помочі родичів Русинів-Українців,  дали переписати українску школу на русинску народностну школу,  така русинска школа може бы до гнескай успішно екзістовала. Але ЗРУСР неузнават Русинів, неузнават ані русинскый язык. Слово Русин в назві мают лем як масковацій артікел, не як знак узнаня Русинів. 

 

А тепер правда вышла наяво. Радшей ЗРУС-овці охабили паднути свою українску школу, як бы мали склонити голову перед кодіфікованым русинскым языком. Русины бы на русинскый язык дали свої діти, але на українскый недадут. То не є хыба Русинів, ані містского парламенту же школа в Гуменнім  заникла, але хыба намысленості функціонарів ЗРУСУ, котры неузнавают русинскый язык за ровноцінный з українскым языком. 

 

Повідаюд люде же, кажда піха предповідат пад. А ту маме назорный приклад піхы і намысленості  функціонарів ЗРУСУ. Вину на занику школы, подля мене,  має  ЗРУСР і їх председа а нихто іншый.   

 

Ян Калиняк