Ambasador Kanady u Keresture

 

Амбасадор Канади у Сербиї, його екселенция Роман Ващук, вчера започал нащиву Рускому Керестуру, хтору предлужує и нєшка.

Амбасадор Канади вчера нащивел Национални совит (НС) Руснацох, дзе му домашнї були предсидатель Совиту Славко Рац, член НС Михайло Зазуляк, предсидателька Одбору за културу НС Лидия Пашо и директоре Школи „Петро Кузмяк" и Дому култури Янко Хома и Йоаким Рац.
 

Як ше указало у розгварки, амбасадор Ващук добре упознати з руску националну заєднїцу у Сербиї, односно у Войводини, як и з висельованьом Руснацох з наших местох до Канади. Упознати є и з нашу културу, образованьом и информованьом, а як гварел, порядно чита новини „Руске слово", поопатра и Рутенпрес, а о роботи Националного совиту ше информує и прейґ веб-сайту НС.

Тиж так, амбасадорови Канади у Беоґрадзе Романови Ващукови, котри, як зме вчера дознали, задлужени и за Чарну Гору и Македонию, досц добре позната и ситуация у дакеди наймоцнєйшим керестурским подприємстве „АБЦ фуд", тераз у предликвидациї, а домашнї го замодлєли же би поштредовал при евентуалних инвеститорох, як за Хладзальню, так и за други потенциялни инвестициї, понеже порихтани простор за индустрийну зону.
 

Як гварел амбасадор Ващук, єдни з потенциялних укладачох до старого краю би могли буц праве и Руснаци-миґранти до Канади, їх други-треци ґенерациї, а бешедовал и о других инвестицийох Канади у Сербиї. На єдну таку, нєшка пополадню одходзи до Оджаку, дзе найвекша канадска фабрика за продукцию авто-часцох „Маґна", уложела свой капитал.
 

Амбасадора Канади интересовало як ше Одлуки Уставного суду Сербиї о утаргованю компетенцийох Войводини одражую на нашу националну заєднїцу и Национални совит, на цо Славко Рац гварел же за тераз ище вше шицко функционує нормално, но нє познате як будзе далєй, насампредз у компетенцийох над сновательнима правами у писаних медийох. Як гварел Рац, нови закони нє провадза и потребни провадзаци законски акти, а тераз найвекше обаванє пре прекомпонованя власци у локалних штредкох и пробованє меняня руководства у главних институцийох значних за Руснацох.
 

Бешедоване и о нашим проблему з нєдостатком дзецох у оддзельньох по руски, спомнута и идея о двоязичних оддзелєньох, у чим, як гварел пан Ващук, Канада ма барз вельке и добре искуство, чию часц би можебуц могло вихасновац и за школи у Войводини.
После нащиви НС, амбасадор Роман Ващук нащивел Школу „Петро Кузмяк" и єй интернат, накратко бешедовал и зоз школярами трецей класи ОШ, з хторих ше велї похвалєли же маю дакого блїзкого у Канади.
 

Його екселенция, амбасадор Канади Роман Ващук вчера присуствовал и на служби Божей у керестурскей Катедралней церкви и програми з нагоди Миколая, а за госца Церковни одбор и парох о. Михайло Малацко вчера орґанизовал вечеру на парохиї, дзе амбасадор Канади и ноцовал.
 

Нєшка, на Миколая, амбасадор Канади Роман Ващук будзе присуствовац на Велькей служби Божей, а по служби, од 11 г. у Месней заєднїци будзе мац розгварку з керестурскима привреднїками и представителями Месней заєднїци.

 

aвтор: зам