Aňi z dvoch razoch ne vibrani predsidateľ Nacionalnoho sovitu Rusnacoch

 

Анї з двох разох нє вибрани предсидатель Националного совиту Руснацох

И попри гласаня на два раз, всоботу, 3. юлия, на Конститутивней схадзки нє вибрани предсидатель нового Националного совиту Руснацох. Предсидатель нє вибрани понеже анї єдно з двох предложених кандидатох нє достало потребну абсолутну векшину од 10 гласох, як то спрам предписаньох.

После верификованя мандатох членом нового Националного совиту, на основи писмено датих предлогох, як то спрам Дїловнїка о роботи Конститутивней схадзки, схадзку водзело Роботне предсидательство у составе Йовґен Мудри, предшедуюци (з лїстини “Руска лиґа-Олена Папуґа”), Аранка Медєши (з “лїстини “Руска матка) и Мирон Сабадош (з лїстини "Вєдно за Руснацох”).
 

На предлог Роботного предсидательства, дньови шор дополнєни з вибором предсидателя и точку "Рижне", так же, тиж на основи подписаних предлогох, за предсидателя Националного совиту Руснацох на схадзки предложени Олена Папуґа, ношителька виберанковей лїстини "Руска лиґа-Олена Папуґа”, котра у НС ма 5 членох и Славко Рац Цацо, ношитель виберанковей лїстини “Вєдно за Руснацох”, котра у НС ма седем членох, а пре одсутносц, пре здравствени причини, Славка Ороса, схадзки присуствовали 6 члени нового Совиту з тей лїстини.
 
Национални совит з явним гласаньом одлучел же би ше о виборе предсидателя НС гласало тайно, Виберанкову комисию творело Роботне предсидательство, а як пред гласаньом потолковал представитель Министерства за людски и меншински права Люан Коко, за вибор було потребне достац абсолутну векшину од 19 членох Совиту, односно 10 гласи, а нє просту векшину од присутних членох Совиту.

После гласаня и зводзеня резултатох, Славко Рац Цацо достал 9 гласи, Олена Папуґа достала 8 гласи, а єден гласацки лїсток бул нєважаци, так же предсидатель нє вибрани.
 

З оглядом на розположенє членох Совиту же би ше на тей Конститутивней схадзки вибрало барз важну и одвичательну финкцию предсидателя Националного совиту, дзепоєдни члени Совиту и Люан Коко, предложели же би ше направело павзу, под час хторей кандидати за предсидателя попробую дойсц до виходзеня з тей, як гварене "пат-позициї". Ґу тому, Люан Коко консултовал и Министерство о можлївосци другого виберанкового кругу на Конститутивней схадзки.
 

Понеже така можлївосц одобрена, приступене другому кругу вибору предсидателя, за цо були предложени исти двойо кандидати, а тиж ознова принєшена одлука же би ше о виборе предсидателя гласало тайно.
 

И у другим кругу, резултат гласаня бул идентични як и у першим - Славко Рац достал 9, Олена Папуґа 8 гласи, а єден виберацки лїсток бул нєважаци, понеже заокружени обидва мена, так же всоботу нє вибрани предсидатель Националного совиту Руснацох.

На предлог члена Роботного предсидательства Мирона Сабадоша, же би шицки 18 члени нового Националного совиту отримали консултациї на завартей схадзки, без присуства явносци и после догварки, ище раз пробовали вибрац предсидателя НС, пошли до другей просториї, алє анї после того, вибор предсидателя нє отримани. Як дознал Рутенпрес, на тей завартей розгварки бешедоване о дальшей роботи и можлївих одборох по обласцох НС, алє тота схадзка нє була урядова.
 

Спрам законских предсписаньох, схадзку Националного совиту на хторей будзе вибрани предсидатель тиж зволує Министерство за людски и меншински права, а то муши буц покончене у чаше од 60 днї од дня конституованя Националного совиту. Як нєурядово дознал Рутенпрес, можлїве же тота схадзка будзе отримана уж концом того тижня, пре наступни рочни одпочивки, а попри вобору предсидателя, нови НС ше ма догвариц и о роботи на ускладзованю Статута з новим Законом о националних совитох, Дїловнїка о роботи, та о виборе одборох за обласци над хторима є компетентни.
 

(конєц) зам