Bešeda Slavka Orosa na prijemu pri Viktorovi Juščenkovi

НОВИ САД, 26. юний 2009. (Рутенпрес) - У рамикох Самиту шефох державох централней Европи, котри од 18. по 20. юний отримани у Новим Садзе, предсидатель Републики України Виктор Ющенко иницировал стретнуце зоз представителями рускей и українскей националней заєднїци у Сербиї.

Стретнуце з представителями нашей и українскей националней заєднїци отримане 19. юния у Новим Садзе, у Городскей скупштини, а як наглашел предсидатель Националного совиту Руснацох Славко Орос, представителє рускей националней заєднїци на тото стретнуце були поволани як представителє рускей, а нє українскей националней заєднїци.

Бешедуюци по руски, предсидатель Националного совиту Руснацох Славко Орос, на стретнуцу зоз предсидательом України Виктором Ющенком, гварел:
- Жадам у мено Руснацох, у мено рускей заєднїци у Републики Сербиї, подзековац Вам же сце у шицких своїх обовязкох хтори маце тих дньох, нашли часу и за представительох русинскей заєднїци у Републики Сербиї.

- Ми, нашо предки, пришли до тих крайох пред вецей як 260 роками, вецей як два и пол вики зме уж ту, на тих просторох.

- Пришли зме ту по Контракту, як Рутени, Русини, грекокатолїки и, дзекуюци насампредз своїм вредним руком, власней витирвалосци же би чували свой язик, же би чували свойо обичаї, а потим, дзекуюци и Церкви и школи хтору вибудовали пошвидко по приселєню, та шицким другим институцийом хтори после збудовали - остали до нєшкайшого дня тото цо були кед пришли.

- Вшелїяк же ше у тим периодзе, за вецей як два и пол вики, случовали велї процеси у цалей Европи и у цалим швеце.

- Меняли ше велї держави, меняли ше велї гранїци, случовали ше велї процеси и на тих просторох одкадз нашо предки пришли, єдна мала гарсточка, єдна малочислена, алє упарта и вредна гарсточка, нє дала ше и зачувала свойо обичаї, зачувала свой язик, зачувала шицко тото цо твори єден национални идентитет.

- Були и чежки периоди, може найчежши концом 19. и початком 20. вику, кед уж випатрало же нас пошвидко нєстанє на тих просторох, же нас нє будзе.

- Алє, думам же з твореньом Кральовини Сербох, Горватох и Словенцох после 1920. року, зоз твореньом одредзених наших институцийох, почало ше з кодификованьом того язика на хторим ми ту бешедуєме, розпочати процес єдного националного будзеня, хтори предлужени после Другей шветовей войни.

- За тот цали период, у шицких обласцох хтори значни за национални идентитет - вибудовани институциї, вибудована єдна система хтора нас зачувала.

- Нєшка на тих просторох, а спрам остатнього попису, єст нас - як Руснацох, Русинох - 15 905, може то уж и дакус менєй, алє медзи 15 и 16 тисячи.

- Маме образовну вертикалу од предшколских установох по факултет, маме установи, институциї у обласци медийох, маме нашо школи на руским, русинским язику, маме штредню школу - ґимназию и катедру за русинистику.

- Маме и велї институциї у шицких других обласцох, а мушим повесц же за тото мушиме подзековац и нашим предком и шицким нашим предняком хтори ше за тото борели, алє и толерантному окруженю у хторим зме жили.

- Тиж и шицким другим заєднїцом, шицким другим народом з хторима зме ту вєдно були, хтори толерантно з нами вєдно дзелєли судьбу. И, вшелїяк, держави хтора щиро, континуовано и нєсебично потримовала нас таких яки зме, яки зме ше чувствовали, яки зме ше вияшньовали.

- Я верим, жадам и наздавам ше же єдного дня у шицких державох Европи, у шицких державох швета, велї з тих ришеньох хтори ту у нас, хтори ми знаме же добри ришеня, буду так применєни вшадзи.

- Же єдного дня шицки, чуваюци свойо, з любову чуваюци свойо и почитуюци шицких других у окруженю, будземе будовац заєднїцу европских народох.

- А, думам же то єдна з темох о хторей Ви маце тих дньох бешедовац и я вам у тих напруженьох, у тих бешедох зоз шицкима предсидателями державох з хторима будзеце нєшка ту, жадам вельо успиху и жадам Вам же би сце ше чувствовали як дома - гварел предсидатель Националного совиту Руснацох Славко Орос, на стретнуцу зоз предсидательом України Виктором Ющенком.

(конєц) зам