Bleskovyj rozhovor z ...

... Janom Kalyňakom, kandidatom na predsedu Rusyňskoj obrody na Sloveňsku (ROS)

Pan Kalyňak, oholosyli ste svoju kandidaturu na pozyciju predsedu ROS. Što by ste hlavňi chotili zminyti v najstarši rusyňski organizaciji?
Treba hlavňi zminyty nekoncepčnyj prystup u planuvaňi aktyvit ROS na koncepčnyj i dovhodobo planovanyj. Zato treba vypracuvaty Koncepciju rusyňskoho narodnoho obrodžiňja na Slovensku. Taka strategia doteper ne je nykym vypracuvana. Ja na ňij robľu.

Navrhujete aj zminy v Stanovach ROS...
Zminy v Stanovach jem navrhnul na zaklaďi dovhoročnych skusenosťi z funguvaňjom odvolacoho aparatu v ROS. Vedžiňja choče vyminyti predsedu ROS, ale ne može. Taku prax už jem v ROS zažyl dva raz. Potim z toho vynykali vse problemy. Zato jem dal zminy v sposobi pravomoci na možnosť odvolaňja predsedy ROS, predsedom KV ROS. Jak choču uplatnyty koncepčnyj sistem v roboťi ROS, mušu zabezpečiti i kontroľu nad vykonnym organom ROS. Nemože kontrolnyj organ byti zaroveň i vykonnym organom tym, že bude mati jednoho predsedu v tij istij osobi. V tim vidžu zakladnyj nedostatok v sučasnij štrukturi rjadžiňja organizaciji.

Jakym sposobom sa vede v diskusia o problemoch v ROS pered snemom?
Doteper o problemoch v ROS sja ne vede nyjaka verejna diskusija, bo na toto ROS ne vytvoryla nyjaku platformu. Ani novynky ne povňat svoje poslaňja v tim smeri. Možnosť verejnoj diskusiji o problemach mi chybuje. Informuvanosť verejnosti o problemach ROS je minimalna. Všytko sja vede lem v kuloarach, mimo učasti šyrokoho členstva ROS.

Jaky byli a bo iši sut reakciji na Vašu ohološenu kandidaturu?
Ja ne jem samozvanec na post predsedu ROS. Mene za kandidata na predsedu ROS vysunula vyročna členska schodza u Svidnyku v apriľi 2008 zato, že zme nespokijny z tym, jak sja nakladat z našyma projektami, skorše nedotihujut sja našy predstavy o muzejnyctvi, školstvi, chronologiji, rusyňskim jazyku, rusyňskij moderňij muzyki, profesionalnych osvetovych pracovyskach. Našy dumky sja vlasni neprosadžujut. Rozhodujut o nych ľude mimo nas, bez nas, slabo informuvany o problematiki a robľat v calkom inšim smeri, jak je to podľa našych predstav potribne. Sučasna realizacija aktivit v ROS nekorešponduje z ciľom, čom zme našy projekty stvoryli i dali do praxu. Šytka robota v ROS sja zužyla lem na folklorny subory i na folklornych spivakiv. ROS už zato perestavat byti majakom narodnoho obrodžiňja a začinat byti obyčajnov komerčnov organizacijov zamirjanov lem na schosnuvaňja rozpočtu i financij MK SR prýdilenych na rusyňsku narodnostnu menšynu.
Što sja tykat ohlasu na moju kandidaturu, molody ľude i jednotlyvci, kotrych ja považuju za osobnosti v rusyňskim narodi, osobnosti v naukovij sferi, pedagogy, z mojov kandidaturov i mojima predstavami suhlasjat. Sut ochotny zo mnov spolupracuvati na važnych obrodyteľskych temach, jak budu zvolenyj do čela organizaciji. Už vece jak pered rokom jem dostal ponuku zorganizuvatý i očelyty samostatne združiňja rusyňskych vyznamnych osobnostej, kotry chočut robyty serjozny veci pro rusyňskyj narod, ale v sučasňij ROS nevyďat perspektyvu pro narod. Ja jem dovhoročnym členom ROS i zato pokušu sja čerez kandidaturu na predsedu ROS zvyšyty važnosť i spoločensku avtoritu organizaciji zapojiňom do roboty vyznamnych osobnosti z rusyňskoho svita, nastoľiňom važnych narodnych obrodyteľskych tem na rišiňja, i spojity rusyňsky združiňja na Sloveňsku na bazi svojoj Koncepciji rusyňskoho narodnoho obrodžiňja na Sloveňsku.

Ďjakuju za rozhovor.
- lj -