Bohati Festival ruskej (rusinskej) kultury

Богати Фестивал рускей култури

За Пейдзешати Фестивал рускей култури “Червена ружа” пририхтана богата програма - аж 13 стаємни и провадзаци манифестациї и змисти. После нєшкайшого Шветочного отвераня, та промоциї кнїжки, нащивителє у голу Школи “Петро Кузмяк” можу опатриц ретроспективну виставу “Руска подобова творчосц”, на хторей виложени 34 подобови роботи исто тельо наших авторох.

Наютре, 24. юния, на сцени у дворе Школи, од 20 г. будзе отримана манифестация “Червена ружа” - ретроспектива шпиванкох, композиторох и шпивачох з дотерашнїх фестивалох, на хтору уход безплатни. После ретроспективи, наютре од 22 г., у сали Дому култури, будзе отримани други концерт Дьордя Балашевича. “Червену ружу” наютре, на пияток, на вечаре ретроспективи привита єй ґенерални покровитель, предсидатель Влади Войводини Боян Пайтич.

Окреме будзе богата програма Фестивала на соботу, 25. юния, бо дополадня, од 10 г., у физкултурней сали Школи будзе отворени Саям рускей привреди, а пополадню, од 18 г., у  єдней з учальньох Школи будзе отримани и Округли стол руских привреднїкох.  На соботу пополадню, од 14 г. по валалє будзе дефиле Конїцкого клубу СД “Русин”, а на керестурским Ярашу, од 15 г. почню предзмаганя у вельким фодбале екипох з наших местох  - з Руского Керестура, Нового Орахова, Дюрдьова и Коцура, у рамикох Спортских бавискох “Яша Баков”.

У дворе Школи, на соботу пополадню, од 17 г. будзе отримана и музично-танєчна манифестация дзецох “Червене пупче”, а на вечар, на истим месце, од 21 г. будзе отримани Шветочни концерт Фестивала “На штред широкей ровнїни”.  Як наявене, на Шветочним концерту наш Фестивал привита министер култури, информованя и информацийного дружтва у Влади Републики Сербиї Предраґ Маркович.

После Шветочного концерту, у дворе Школи, од 23 г. будзе отримани и концерт ґрупи “Фрайли”. Госци з иножемства на Шветочним концерту буду Закарпатски народни хор з Ужгороду, з України, Хлопска шпивацка ґрупа “Гачуре” з Гуменого, зоз Словацкей, та Фолклорни ансамбл КУД “Яким Ґовля” з Миклошевцох, з Горватскей.

На нєдзелю, 26. юния, у Велькей служби на 10г., у керестурскей Катедралней церкви будзе шпивац госц з Ужгороду - Закарпатски народни хор, а пополадню, од 15 г., на Ярашу буду отримани финални змаганю у фодбалє. Фестивал будзе закончени на нєдзелю, 26. юния вечар, у дворе Школи, з манифестацию “Червена ружа”, односно зоз змаганьом за найкрасши дзивоцки и леґиньски глас.

Наявене же ювилейну “Червену ружу” завре подпредсидателька Влади Войводини Ана Томанова Маканова. На концу “Ружи”, у дворе Школи будзе отримани огньомет. Понеже бина будзе закрита, без огляду на хвилю, шицки музично-танєчни манифестациї, крем концертох Балашевича, буду отримани на отвореним - у дворе Школи “Петро Кузмяк”

(конєц) зам