Bulo jedenac predstavi

РУСКИ КЕРЕСТУР - ДРАМСКИ МЕМОРИЯЛ

Було єденац представи
Всоботу, 24. априла, у Руским Керестуре закончена тогорочна смотра театралней творчосци Руснацох - Драмски мемориял Петра Ризнича Дядї, хтори тирвал од 16. априла.
На 42. мемориялє виведзени єденац представи - шейсц з местох дзе жию Руснаци у Войводини, три Руснацох з Горватскей, як и два госцуюци представи.

На Драмским мемориялє участвовали представи за старших з Руского Керестура, Дюрдьова, Коцура и нашого РНТ "Петро Ринич Дядя", з войводянских руских местох, та єдна представа за страших з Петровцох, з Горватскей.

Тогорочна продукция дзецинских представох Руснацох з Войводини - була лєм єдна представа Суботичанох, док два дзецински представи пририхтали Руснаци у Горватскей - з Вуковару и Петровцох.

Спомедзи пейц представох за старших з руских местох у Войводини, на Мемориялє виведзени и побиднїцки представи прешлорочного Фестивала моно и дуо-драми у Новим Садзе, односно єдна дуо и єдна монодрама.

Як госци, на Драмским мемориялє участвовали аматере зоз Кули, та професионалци зоз Кикинди.
Под час тирваня Меморияла, од 16. по 24. април, у голу керестурского Дома култури була поставена вистава малюнкох Янка Чижмара з Нового Саду.

Шицки ансамбли-учашнїки Меморияла, як и наградзени ґлумци за найлєпше одбавену улогу єдней представи за старших, достали кнїжку Дюри Латяка "театрални живот Руснацох - перша часц", котру Мемориялу даровало новосадскей "Руске слово".

(конєц) зам