Bzikŷ všŷtkŷch deržav sojedyňajte s’a…

Іnternetovŷj sajt Mist Online publikovav staťu Іhora Berčaka o, jak je v nazvi stati napysano, „antiukrajiňskim kongresi“, kotrŷj mav prochodyty v Prazi. Choc’ ne bŷty Berčakovoj stati, jakbač bŷ o tim „nebezpečnim“ kongresi nychto any ne znav, po publikovaňu stati s’me s’a diznaly, že za kongres nesuť zodpovidnosť znova Rusynŷ.

Jak s’a pyše u spomynanij stati, Služba bezpekŷ Ukrajinŷ vede rozslidžovaňa u spravi probŷ o perevz’aťa vlastej u zvjazku z prochodžiňom tzv. Peršoho nacionalnoho ukrajiňskoho kongresu  v maji 2018-ho roku. Totu informaciju mav maty avtor textu iz oficialnoho registra. Učastnycy kongresu ho maly vŷholosyty s’a za jedynŷj zakonodavčij organ vladŷ Ukrajinŷ, i Ver’chovnu radu Ukrajinŷ, Generalnu prokuraturu Ukrajinŷ i Ministerstvo vnutrišnich sprav Ukrajinŷ maly vŷholosyty za zločinec’kŷ organizaciji. Tak samo maly na kongresi sotvoryty Ukrajiňskŷj narodnŷj tribunal – jak organ justiciji, i vlastnu bezpeku pid nazvov „Tajemna ekzekьjuta“. Okrim toho bŷlo vŷhološene sotvoriňa Ukrajiňskoj narodnoj armiji.

І keď vŷhološiňa, kotrŷ maly bŷty zroblenŷ u Prazi na tzv. kongresi, zvučať micno, sprava absolutno takov važnov ne je. Vožďom pražskŷch „patriotiv“ maje bŷty Rustam Tašbajev, kotrŷj iz ameryc’kŷm hraždanstvom vže dvi dekadŷ žŷv u Spojenŷch štatach Amerykŷ i robyv šofera. Vernuv s’a na Ukrajinu u 2014-im roci, chotiv robyty Majdan 3.0 i nakonec’ bŷv iz Ukrajinŷ deportovanŷj. Sam mav maty zvjazkŷ iz tzv. Luhaňskov narodnov republikov. Ľudy kolo ňoho maly maty tak samo problem iz zakonom. Tašbajev mav maty problem zo zakonom dokinc’a už pered svojov emigracijov.

No buďjak smotryme na „političnu kar’jeru“ Tašbajeva, joho kongres prypomynať skoriše klavnijadu v slavnim Cirku Humberto, jak dospravdove ohrožiňa. Čolovik sobi našov kolo sebe dalšŷch bzikiv, žebŷ iz jakojs’ pyvnici v Prazi išly robyty bez buďjakoj pidporŷ hraždaniv Ukrajinŷ velyku revoluciju, to je na smich, i na dobroho psichiatra. Nyč vece.

Tašbajev iz svojim kongresom prypomynať jednako, povičme, „zapalenŷch“ ľudej iz Slovakiji, kotrŷ sobi daly nazvu Hraždaňkŷj tribunal. Tota grupa bzikiv, v kotrij s’a rušať od 3 do 10 ľudej, už rokŷ chodyť pered riznŷ ur’adŷ, do medij i žadať perevz’aty kontroľu nad inštitucijov, kotra maje totu česť maty jich navščivu, keďže podľa tzv. tribunalu bŷla Slovac’ka republika podľa stati ne znam kotroj i paragrafu tak samo ne znam kotroho Konštituciji slovac’koj republikŷ zrušena i ony preberajuť vlasty. Za paru rokiv svojoj tverdoj robotŷ sobi vŷslužŷly paru viralnŷch videozapysiv, kotrŷ bavľať Slovakiju. Kongres Tašbajeva maje podobnŷ šansŷ, lemže o nim doteper’ vlastno jakbač malochto znav. Teper’ s’a to može zminyť.

No sprava tzv. kongresu bŷ ne bŷla nyjak interesnov, kebŷ Berčak ne začav hľadaty pryčinŷ, čom jak raz v Prazi prochodyla tota „vŷznačna“ podija. І kebŷ v tim ne našov Rusyniv.

Avtor stati s’a zvidať, čoho takŷj odkrŷto antiukrajiňskŷj kongres prochodyv u stolyci Čes’koj republikŷ. No i ne vŷlučuje, že zavďakŷ najblyzšoho otočiňa prezidenta Miloša Zemana. І takoj prypomynať, že u vŷborčim štabi Miloša Zemana, kotrŷj mynulŷj rik druhŷj raz vŷhrav prezidenťskŷ vŷborŷ, maly bŷty ľudy iz vedžiňa Svitovoho kongresu pidkarpaťskŷch Rusyniv, konkretno Vasyľ Džuhan i Mychail Ťasko. Ľudy, kotrŷ, jak pyše Berčak, žadajuť avtonomiju Zakarpaťskoj oblasty Ukrajinŷ.

Bez ohľadu na to, jakŷ suť abo ne suť našŷ simpatiji do dijalnosty Džuhana i Ťaska, treba odkrŷto povisty, že kontaktŷ z prezidentom Zemanom, kotrŷj jednako, jak vŷražať s’a negativno na adresu Ukrajinŷ, vŷražať s’a i na adresu Evropskoj uniji i dalšŷch sojuznykiv Čes’koj republikŷ, išči ne značať zodpovidnosť za všŷtko protyukrajiňske, što s’a v Prazi stane. Navece, žadaty avtonomiju Zakrpaťskoj oblasty je lem žadosťov o vŷpovniňa platnoho referenduma iz 1991-ho roku v zhodi z vtohdŷ platnŷma zakonamy. І absolutno to ne značiť, že na osnovi kontaktiv dvoch spomjanutŷch osob, tvoryť s’a v Prazi jakes’ „pokrovyteľstvo“ Rusyniv, jak to pyše avtor, nad podijamy bzikiv, podijamy antiukrajiňskŷma, z tŷm, že ony to znajuť čerez prezidenta zabezpečity. O takim vplyvi, i kebŷ ho maly dospravdŷ chotity, dumam Džuhan i Ťasko možuť lem snyty.

Berčak ne davať jasnŷ dokazŷ o tim, že bŷ buďchto iz rusyňskoho ruchu bŷv zalučenŷj v organizaciji tzv. kongresu. Našto bŷ i davav? Vin sam jich ne mať. No je to v modi, žebŷ spomjanuty kolo všŷtkoho pidloho i Rusyniv. To stačiť i uspich takoho pohľadu je garantovanŷj v dakotrŷch patriotičnŷch kruhach. І mena dvoch spomjanutŷch osob z času na čas pojavľajuť s’a v prostori ukrajiňskoho internetu, značiť ne je problem trafyty na nych takoj pry peršim vŷhľadavaňu slova Rusyn. Robota hotova.

Cilŷj tzv. kongres jakojs’ maloj tajnoj grupŷ v Prazi, kotra klyče po perevz’aťu vlastej v Kyjevi, jakŷj je o 1400 kilometriv dale, i na čoli kotroj stojiť šofer z ameryc’kŷm pasportom, je tragikomedija i ťažka suďba bzikiv. Jakbač s’a tŷm Služba bezpekŷ Ukrajinŷ v situaciji, v jakij deržava je, zo zakona musyť zanymaty, no vece bŷ s’a tŷm mav zanymaty dobrŷj likar’. Takŷch bzikiv mož najty buďde na sviti. No ony ne suť tŷm najholovnišŷm ohrožiňom.

Ohrožiňom, kotre može dospravdŷ prynesty nepokij, hraždaňsku nenavysť medži ľudmy, i tŷm realnŷj problem v deržavi, suť napryklad stati, v kotrŷch s’a vŷťahne jakas’ menšŷna i bez dokaziv obvynyť iz protyderžavnoj dijalnosty. Parafrazujuči stare zname heslo zistavať povisty lem jedno: Bzikŷ všŷtkŷch deržav sojedyňajte s’a, a zakonoposlušnŷm Rusynam dajte pokij!

PETRO MEDVІĎ 

Staťa bŷla napysana jak komentar’ „Vstupne do kontroly“ lemkivskoho radija lem.fm.

Žridlo:
http://www.lem.fm/bzikyi-vshyitkyih-derzhav-soyedinyayte-sya/?fbclid=IwAR3GsR2Z_Hu43s67EXvfZ2Y1YzN21N637QJjpMeTqbLR0KfEqa4oySngAv0