Centrálne oslavy Dňa Rusínov v Srbsku

 

ШИД - НАЦИОНАЛНЕ ШВЕТО  Отримана Централна шветочносц

 

Централна шветочносц з нагоди Националного швета Руснацох у Сербиї, 17. януара, отримана вчера у Шидзе. Означованє почало дзень скорей, 16. януара з отвераньом Сайма руских привреднїкох у Руским дворе.

На Сайме свою дїялносц представели коло 20 привреднїки з вецей наших местох, а у рамикох Сайма, вчера 17. яануара, отримани и Округли стол о можлївосцох привредного сотруднїцтва руских привреднїкох.
 

Означованє Националного швета Руснацох у Сербиї вчера почало з Архиєрейну Благодарну Службу Божу у Церкви Преображеня Господнього, котру предводзел апостолски еґзарх за грекокатолїкох у Сербиї и Чарней Гори, преосвящени владика кир Георгий Джиджар.

После Служби, у сали Култуно-образованого центру Шид отримана Шветочна академия з нагоди Националного швета Руснацох, котрей присуствовали числени Руснаци зоз Шиду и местох шидскей општини и Сриму, члени нашого Националного совиту, представителє шицких наших установох, орґанизацийох, здруженьох, културно-уметнїцких дружтвох, привреднїки з наших местох, як и представителє општинох у котрих жию Руснаци.
 

На Шветочней академиї були присутни народни посланїки у Скупштини Републики Сербиї Олена Папуґа и др Дюра Мученски, посланїца у Скупштини АП Войводини Леона Виславски, владика кир Георгий Джиджар; представнїца Канцелариї Защитнїка гражданох Далиборка Дринич, директор Служби на национални меншини и помоцнїк покраїнского секретара за управу, предписаня и национални меншини Мариус Рошу, заменїк покраїнского секретара за културу Радослав Петкович, та предсидателька општини Шид Наташа Цвєткович.
 

На Шветочней академиї у Шидзе присуствовали и представителє других националних совитох националних меншинох у Сербиї и заводох за културу националних меншинох у Войводини, представителє Амбасади Русиї у Серби як и представителє Руснацох з Републики Горватскей, на чолє з предсидательом їх Ради, Якимом Ердельом.
 

Попри предсидателя Националного совиту Руснацох у Сербиї Славка Ороса, Националне швето Руснацом на Шветочней академиї з пригоднима словами повинчовали директор Служби на национални меншини и помоцнїк покраїнского секретара за управу, предписаня и национални меншини Мариус Рошу, владика кир Георгий Джуджар и предсидателька општини Шид Наташа Цвєткович.
 

Шветочна академия у Шидзе почала з виводзеньом сербскей гимни "Боже правде" и общеприлапену шветочну шпиванку Русинох швета - "Порученє", на слова Александра Духновича.
 

Зоз програму Шветочней академиї були означена и 200-рочнїца снованя парохиї у Шидзе и 90-рочнїца од початку орґанизованого културно-просвитного живота Руснацох у Шидзе.
 

Косцанїк тогорочней Шветочней академиї бул Национални оркестер, составени зоз 17 наших професийних музичарох.

Програму централней шветочносци означованя Националного швета Руснацох у Републики Сербиї у Шидзе пририхтали Национални совит рускей националней меншини, Завод за културу войводянских Руснацох и Орґанизацийни одбор Шид, а Шветочна академия орґанизована у сотруднїцтве з Културно-образовним центром Шид и РТВ Войводини.
 

После Академиї, у голу Културно-образовного центру отримани пригодни коктел з рускима традицийнима єдлами, котри прирхтали жени зоз Шиду. Вечера за учашнїкох програми була организована у просторийох шидского КПД "Дюра Киш".
 

(конєц) зам