DEVA (RUMUNIJA) ŠVETOVA RADA RRL

Треца схадзка Шветовей ради, под предшедованьом єй предсидателя Дюру Папуґу, будзе отримана на ютре, 3. марца, кеди будзе отримана и схадзка Конґресней комисиї за културу, под предшедованьом єй предсидателя Миломира Шайтоша з Нового Саду. На Ради будзе бешеди о видатих перших двох числох нового глашнїка „Гласу Русинох”, хтори од конца прешлого рока почал видавац Шветови конґрес.

Як плановане, зоз схадзки у Румуниї Шветова рада до Министерства школства Словацкей Републики пошлє вимогу за запровадзованє високошклских порядних штиророчних, односно мастер студийох русинскей фолклористики на Прешовским универзитету, за студентох зоз жемох штредней Европи.
Тиж так, до Одсеку за русинистику Филозофского факултету Универзитету у Новим Садзе ма буц послата вимога за заєднїцке орґанизованє Штвартого медзинародного конґресу русинского язика, у Новим Садзе.

Шветова рада будзе розпатрац и актуални стан и активносци русинских орґанизацийох, членїцох Шветового конґресу у тим року, а на дньовим шоре и прилапйованє заключеньох з Конґресней комисиї за културу. Як предвидзене, Конґресна комисия за културу у Деви принєше Предкладанє календара шицких русинских/руских/лемковских културних манифестацийох и фестивалох, пре черанку и участвованє на нїх ансамблох зоз жемох дзе жию РРЛ.

Спрам предложеного дньового шору, Конґресна комисия за културу иницирує запровадзованє Награди Шветового конґресу РРЛ у обласци култури, з меном Ендия Варголи, алє и сновцанє Асоцияциї русинских подобових творительох. Будзе бешеди и о дзепоєдних заєднїцких активносцох у тим року, о пририхтованю за попис жительства у жемох дзе то ище нє окончене, о преславох Дня Русинох у жемох дзе жиєме, та дзепоєдних заєднїцких културних акцийох. Як плановане, будзе одредзене место и час Штвартого зашеданя ШР, а вєдно з ню и Конґресней комисиї за статут Шветового конґесу РРЛ.

У дньох пред и после схадзки, 2. и 4. марца, у Деви за членох ШР и Конґресней комисиї за културу, домашнї пририхтую и пригодну културно-уметнїцку програму.

(конєц) зам