Djura Papuga oznova vibrani za predsidateľa Švetovoj rady RRL

Дюра Папуґа ознова вибрани за предсидателя Шветовей ради РРЛ
Часц Роботного предсидательства дванастого ШК РРЛ (долу часц учашнїкох)
Дотерашнї предсидатель Шветовей ради Руснацох/Русинох/Лемкох (ШР РРЛ) Дюра Папуґа з Руского Керестура, ознова вибрани за предсидателя того вивершного цела Шветового конґресу (ШК) РРЛ.
 
Як Рутенпрес дознава од портпарола Рускей матки и учашнїка Конґресу Миломира Шайтоша, на внєдзелю законченим дванастим ШК РРЛ, хтори од 12. по 14. юлий отримани у Ужгородзе и Сваляви на Подкарпатю, у України, попри Папуґу, Конґрес до ШР вибрал Штефана Лявинца з Мадярскей, котри и перши подпредсидатель Ради, Юлия Фирцака з Румуниї, котри други подпредсидатель, Владимира Противняка зоз Словацкей, котри и секретар Ради, Андрея Копчу з Польскей, Мию Шайтоша з Горватскей, Алаксандра Мошколу з Ческей, Славомира Гиряка, котри у Ради представя Русинох зоз Сиверней Америки, Миколу Бобинца з Подкарпатя, з України и Мартина Караша зоз Словацкей, спред Шветового форуму русинскей младежи (ШФРМ).
 
Попри Конґресу, 13. юлия отримани и шести ШФРМ, хтори за свойого предсидателя вибрал Мартина Караша зоз Словацкей. Домашнї Конґресу и Форуму було Крайове здруженє подкарпатских Русинох, зоз шедзиском у Мукачове, дзе учашнїки Конґресу були змесцени, а у Мукачове отримана и часц културней програми.

Делеґати на дванастим Конґресу вибрали и предсидательох його комисийох, дзе аж пецеро зоз Сербиї - за предсидательку Комисиї за просвиту вибрана Ксения Медєши, Комисиї за културу Миломир Шайтош, Комисиї за историю др Михайло Фейса, Комисиї за економски одношеня Владимир Бучко, Комисиї за информованє Владимир Гаргаї, а за предсидателя Комисиї за Статут вибрани Андрей Копча з Польскей. Шицки орґани Конґресу вибрани на два роки.

автор:  зам