Dni zvykyv a tradícii sela Kamjunka

Dni zvykyv a tradícii sela Kamjunka byv názov 3. ročnika podujatia realizovanoho v rámci projektu DNI RUSINSKYCH TRADICII, kotre ša odbylo 4. augusta 2007 v Kamjunci.

Zmina názvu tohto podujatia prinesla i paru zmin v joho štrukturi i organizacii a vyzirjat tak, že toty zminy byli uspešny. Hlavnyma organizatormi podujatia byli Rusinska obroda na Slovensku, selo Kamjunka a obščestvo svjatoho Joana Krestiteľa, ale pridali ša i dalšy jak Poľnohospodarske družstvo v Kamjunci, Dobrovoľnyj hasičskyj zbor, Poľovnicke združyňa, Jednota dochodciv, Klub molodych, FS Barvinok i jednotlivci a tak už od samoho rana v Kamjunci bylo cititi, že ša štosi dije.

Pred obidom sobi rozložyli svoji kotly a ohňi poľovnici, kotry varili guľaš, pridali ša ku nim i dochodkiňi, kotry prinosili voňavy kuchy, makyvniky, chľiby, knyšy, molodšy ženy pekli pjirohy a cilom dedinom zvučali krásny kamjunsky špivanky z novoho CD FS Barvinok. Tota pachota i atmosfera priťahovala mnohych turistyv, kotry cez dedinu prechodili a tak ša zastavovali a prosili ša što ša tu bude robilo, prezirjali si prirychtovany výstavy fotografii, predmetyv, kotry ša využyvali pri liturgickych obrjadach, ale i stary nastroji, využyvany dakody dávno pri robotach.

O 15.30 h začala staroslavjanska liturgia, kotru služylo pjať svjaščenikyv a jednotlivy časti liturgii špivali zbory z Kamjunky, z Litmanovoj i z Poľska. Po svjatyj liturgii sa rozľav dožď, no ani tot dožď neodlakav ľudiv, žeby ša prišli posmotriti na bohaty programy akciji. Pred kulturnym domom pyd stanami vkazovali ša zvyčajny remesla a zastupcove R.O.S, sela Kamjunka, ale i inšych oficialnych organizacii sobi uctili pamjatku pavšych v 1. i 2. švitovoj vyjni položyňom kytic ku pamjatniku padlych.

Po tymto pietnym akti už začav bohatyj trojhodinovyj galaprogram pyd názvom VESELE JE SELO v kotrym ša predstavilo okolo 250 účinkujúčych z Lotyšska, Poľska, Ruska a Slovenska. Zapovnenu salu kulturnoho domu v Kamjunci, kotra nestačyla pojati všytkych a mnohy stojali i vonka privitav domašnij Barvinok z hymnom Rusinyv JA RUSIN BYV a Mikolaj Konyval zo stižkami o Rusinach. Prihvarili ša starosta sela Ing. Mikolaj Mýtnik, predseda R. O. S. Volodimir Protivňak, za obščestvo svjatoho Joana Krestiteľa o. Jaroslav Popovec a o rusínskym vysokym školstvi popovidala doc. Anna Plyšková z prjašovskoj univerzity.

Po tychto slovach už začav bohatyj galaprogram v kotrym ša postupni miňali sólistky rusinskych špivanok Mária Čokynová z Ubľi a Natália Sykorjaková z Litmanovyj, folklórnyj kolektiv Art Etud z Jekaterinburgu z Ruska, populárne rodinne trio Magurových z Humennoho, folklorna skupina Majdan z Litmanovoj, domašne duo Ivana Sivuľkova i Martin Karaš, folklornyj súbor Kekava z Lotyšska, špivacka skupina Zaričanka zo Stakčína, umeleckyj súbor Ajvengo z Ruska, domašňa mandolinová huďba, špivackyj súbor z Poľska a na záver i profesionálnyj orchester ľudovych nástrojov z mista Sredneuralsk z Ruska. Atmosféra v sáľi kulturnoho domu gradovala, ľude ša hostili s tradičnyma Kamjunskym jidlami a počas všytkych vystupyv byv v sáli neutichajúčyj potlesk, kotryj dávav najavo, že program podujaťia ša divákam pačyv. Ani toty, kotry do kulturnoho domu v Kamjunci už nehvošli ša nenudili, bo vonka hrala domašňa kapela RYTMIK i dožď ustav a tak mnohy využyvali kolotočy, stánky z tradičnyma jidlami i inšy atrakciji a tak sobi mych každyj priti na svoje.

Záver programu, kotryj už tradični režírovav Martin Karaš patriv domašňomu Barvinku a kamjunskyj hymni DAJ ŽE BOŽE DOBRYJ ČAS a vera že i byv tot čas dobryj, bo po vystupiňu ša všytky presunuli vonka, de ša zabavjali pri tonach huďby kapel RYTMIK z Kamjunky a ŠARM z Bardijova až do bjiloho rana na veselici pyd žvizdami a tanečnyj zábavi v kulturnym domi.

Guľaš, pjirohy, makyvniky, kuchy a knyšy ša dojili, každyj odchodiv domu spokyjnyj a mnohy i z nezabudnuteľnyma zažytkami. Výrok jednoj z účastničok hvarit za všytko: „Také niečo som počas svojho života ešte nezažila a na DNI ZVYKOV A TRADÍCII OBCE KAMIENKA v živote nezabudnem“. Do svidaňa na četvertym ročniku tohto podujatia.