Do lyku svjatych zapysana Rusynka

 

До лику святых записана Русинка

В суботу 4. Октобра 2014 р. в Нюарку (коло Ню Джерсі) выголосили за блажену сестру Міріям Терезію Демяновічову з Конґреґасії милосердных сестер св. Єлизаветы. Сестра Міріям была дівков русиньскых ґрекокатолицькых еміґрантів із Бардейова, днесь Словацька републіка. Русины так мають далшого чоловіка записаного до лику святых.

 

Тереза Демяновічова ся народила 26. Марца 1901 р. в Бейоні, Ню Джерсі в Споєных Штатах Америкы, як наймолодша із семеро дітей родичів Александра Демяновіча і Йоганы, з дому Сухой. Похрещена, миропомазана і причащана была у візантійскім обряді родичів. Середню школу закінчіла в 1917 році. В тім часі ся хотіла стати кармелітанков, але мала хвору мати, также зістала дома, жебы ся могла о ню старати. По тім, што мати умерла на хрипкову епідемію в 1918 році, Тереза наступный рік зачала штудовати на высокій школі. Заміряна головно на літературу здобыла в році 1923 діплом з вынятковыма резултатами.

 

Все єй але тягло ку жывоту в монастырі. Так в році 1925 вступує до монастыря Конґреґанції милосердных сестер св. Єлизаветы. Сестра Міріям, і кідь вступила до римокатолицькой конґреґації, зохабила собі свій выходный обряд по родичах. Вже як послушниця вызначала ся інтензівнов духовностьов, яка была основана на містічной скушености общіны Святой Тройци і то аж до такой міры, же єй называють „америцьков святов Терезков од Дітины Ісуса.“ В 1926 році духовный проводник сестры Міріям єй пожадав, жебы написала збірку медітацій о духовнім жывоті про остатні послушниці. Тотых довєдна 26 списів было выданых по смерти сестры Міріям в 1927 році у книжці під назвов Векша досконалость.

 

Сестра Міріям умерла 8. мая 1927 року, лем 26-річна, по тім, што была оперована за запал апендіксу. Была похоронена на Цінтері св. Родины монастыря Милосердных сестер св. Єлизаветы. Напрік свому куртому жывоту, вызначала ся великов святостьов жывота. І напрік тому бы може доднесь не была выголошена за блажену, кібы не пришов рік 1964 і з ним повязане чудотворне выздоровліня, яке є приписане якраз сестрі Міріям.

 

Втогды вісемрічный хлопець Майкл Менцер сліпнув. Мав деґенарачну хвороту, котра постигує очі і способує страту централного віджіня. В часі, кідь його мати страчала надію, Майкл дістав од учітелькы мощі монашкы – образок і волося. Сам, днесь 54-річный муж споминать, як лікарі повіли мамі, же за пів рока осліпне. Він але надіяв ся, же вшытко буде іншак. Раз сам выбрав ся домів, і кідь уж майже не видів. Посмотрив ку сонцю і очі го зразу перестали палити. Кідь попозерав долов, ясно увидів волося сестры Міріям, котры довтогды негоден быв ясно видіти. Од того часу ниґда не мав проблемы з очами.

 

Сестра Міріям є першов америцьков монашков, котра є записана до лику святых Католицькой церькви. Нас тішить, же є далшым святым чоловіком, котрый вышов із русиньского народа.

 

Петро Медвідь

 

Zdroj: http://www.lem.fm/do-liku-svyatyih-zapisana-rusinka/