Dobylo serdce Oľhŷ Prokop

3-ho septembra 2020-ho roku v noči u vici 79 rokiv dobylo serdce Oľhŷ Prokop, vŷznačnoj kulturno-obščestvennoj dijateľkŷ sered Rusyniv Pidkarpaťa, ale i ciloj Karpaťskoj Rusy. Oľhu Prokop mož bŷlo znaty napryklad iz grupŷ Trio Červena Ruža, kotre zapysalo album Rus’ Pudkarpats’ka S’ata.

Tak samo vela diťačij ansambeľ Babčyna spivanočka, spivala i v ansambli Čynadijivka. Bŷla znamenytov organizatorkov kulturnŷch podij.

Oľha Prokop narodyla s’a 6-ho septembra 1940-ho roku v seli Kryva, nedaleko Chustu, do rodynŷ Kirila Prokopa, rusyňskoho dijateľa i politika, kotrŷj bŷv i v deputaciji, jaka pryšla za prezidentom Tomašom Garikom Masarikom zo žadosťov o pryjednaňa rusyňskŷch teritorij do skladu Čechoslovakiji. Kiril Prokop bŷv odsudženŷj v Druhim maramorošsko-sigeťskim procesi, v ktotrim sudyly pravoslavnŷch Rusyniv. Počas 1-oj Čechoslovac’koj republikŷ bŷv členom čechoslovac’koho parlamentu. Po aneksiji Pidkarpaťskoj Rusy Sovits’kŷm sojuzom bŷv znova sudženŷj i areštovanŷj. І vďaka tomu Oľha Prokop perežŷla ťažke ditynstvo, koly zistala rodyna lem z mamov i ne maly pravo maty vlastne obŷsťa. No totŷ skladŷ časŷ jej ne zlomyly.

Oľha Prokop bŷla profesionalnov kulturnov i dovhoričnov obščestvennov dijateľkov. Rokamy učila i rusyňskŷj jazŷk a kulturu v rusyňskŷch nediľnŷch školach na Pidkarpaťu, kotrŷ organizovav rusyňskŷj mecenat z Kanadŷ Štefan Čepa. Pr’amo dijala abo spivpracovala v mnohŷch muzyčnŷch tilesach. Akcentovala nelem artističnŷ, no i patriotičnŷ a vŷchovľujuči aspektŷ u svojij tvorčosty.

27-ho maja 2016-ho roku počas ІCh. Bijenale lemkivskoj/rusyňskoj kulturŷ v Krynyci bŷla vŷhološena za lavreatku Premiji imeny Vasyľa Turoka-Heteša, kotru peredavať Svitova rada Rusyniv. Jak vtohdŷ informovav predseda Svitovoj radŷ Štefan Ľavynec’, ocinena bŷla za dos’ahnenŷ vŷznačnŷ rezultatŷ pry rozvytku, popularizaciji i prezentaciji rusyňskoj kulturŷ u všŷtkŷch jij aspektach. Oľha Prokop žŷla v Čynadijevi. Vičnaja pamjať!

PETRO MEDVІĎ

Žridlo:
https://www.lem.fm/dobilo-serdtse-olhy-prokop/