Dudaš: Na baviskoch u Riu poprobujem napravic osobni rekord

Дудаш: На бавискох у Риу попробуєм направиц особни рекорд

 

БЕОҐРАД - Репрезентативец Сербиї у дзешецбою Михаил Дудаш гварел нєшка же на Олимпийских бавискох у Рио де Жанеиру попробує витвориц цо лєпши резултат, а циль му направиц особни рекорд.

 

Резултати на тренинґох указую же форма нє спадла, и же можем обчековац ище єдну шансу же бим направел особни рекорд и борел ше за цо лєпши пласман. Мойо обчекованя исти як и по тераз. Жадам у каждей дисциплини дац шицко од себе и бориц ше сам зоз собу под час цалого змаганя, гварел наш дзешецбоєц.

 

После покалїченя пре котре нє наступал два роки, Дудаш ше пред мешацом врацел на атлетску дражку и освоєл бронзову медалю на Европским першенстве у Амстердаму.

 

Поента дзешецбою же би ше направели дзешец найлєпши резултати. Други Олимпийски бависка указую же перши нє були случайносц и же можем обчековац и треци. Сами бависка коруна успиху каждого спортисти и його спортскей кариєри и прето сцем у тим уживац, гварел Михаил котри ше за бависка пририхтовал на Вледу.

 

Змаганє у дзешецбою у Риу отрима ше 17. и 18. авґуста, а першого дня Дудаша обчекую обегованя на 100 и 400 метери, скаканє до далєка, руцанє кулї и скаканє до висока. Други дзень ше будзе змагац у дисциплинох 110 метери зоз препреченями и 1.500 метери, руцаню диска, cкаканю зоз мотку и руцанє копиї. 

 

Zdroj: http://www.rtv.rs/rsn

 

Foto

Mihail Dudas - Alchetron, The Free Social Encyclopedia

alchetron.com

MihailDudasFotoBETA1jpg