Dudaš osvojel bronzu na Evropskim peršenstve

Дудаш удаш освоєл бронзу на Европским першенстве

Наш олимпиєц Михаил Дудаш освоєл бронзову медалю у седембою на Европским атлетским першенстве у завартим, хторе през викенд отримане у Ґетеборґу, у Шведскей. Треце место Дудаш освоєл з посцигнутима 6 тисячи 99 бодами, цо и нови рекорд Сербиї у седембою.
 
Михаил Дудаш  перши дзень змаганя у седембою, у конкуренциї 15 учашнїкох закончел на першим месце, понеже у шицких штирох дисциплинох - обегованю на 60 метери, скаканю до далєка, руцаню кулї и скаканю до висока, поставел особни рекорди.
 
Вчера заш лєм нє посцигнул обчековани резултати у обегованю на 60 метери з препреченями и у скоку з палїцу, алє у остатнєй дисциплини - у обегованю на тисяч метери, Дудаш знова посцигнул особни рекорд. През циль прешол як штвартопласовани, цо було достаточно же би у цалосним збиру завжал треце место у седембою и бронзову медалю.
 
Посцигнути резултат и освоєну бронзову медалю Михаилови Дудашови такой вчера повинчовала министерка спорту и младежи у Влади Сербиї Алиса Марич.
 
Дудашова медаля друга за Сербию у Ґетеборґу, понеже Асмир Колашинац пияток освоєл злато у руцаню кулї. Ивани Шпанович нє поспишело ше достац медалю, бо у скоку до далєка завжала пияте место.

автор: саб

Дудаш барз задовольни з посцигнутим резултатом

После велького успиху за атлетику Сербиї - освойованя бронзовей медалї у седембою на Европским атлетским першенстве у завартим у Ґетеборґу и поставяня нового националного рекорду од 6 тисячи 99 боди, Михаил Дудаш за Радио Нови Сад гварел:
 
- Барз задовольни, бул сом порихтани, знал сом же сом добре порихтани и пошол сом на змаганє зробиц тото цо сом зробел. Кед сом видзел же сом у добрей форми, дал сом шицко од себе, цо ше ми на концу виплацело з доставаньом бронзовей медалї. Дакус сом подруцел кед у питаню скаканє з палїцу, скочел сом лєм 4 метери и 60 центиметри, бул сом порихтани прескочиц и висину од 5 метери. Но, то охабме за други раз - гварел Михаил.
 
На питанє цо шлїдзи далєй, Дудаш гварел же перше одпочивок, а вец почню пририхтованя за лєтню сезону.
 
- Думам же ше перше будзем змагац у Ґотвицу, у Австриї, вец шлїдзи Шветове першенство и змаганє Декастар у Французкей - гварел Михаил Дудаш.

автор:  ртвв