Ďurďovčaňe nastupeli na "Dňoch Habury"

Дюрдьовчанє наступели на ”Дньох Габури”

На Дванастих "Дньох Габури", хтори у восточней Словацкей отримани 5. и 6 юлия под покровительством Фондациї "Древена церквочка" и места Габура, участвовал и ансамбл КУД "Тарас Шевченко" з Дюрдьова, як и предсидатель Рускей матки и Шветовей ради Руснацох/Русинох/Лемкох Дюра Папуґа и делеґация з Руского Керестура.

 

Дюрдьовчанє у Габури наступели на културней програми у амфитеатре з назву "Я Русин бул, сом и будзем", а представели ше з даскелїма танцами, шпиванками Дзивоцкей шпивацкей ґрупи и оркестру Дружтва, а на програми наступела и Саня Полдруги зоз своїма шпиванками.

 

Културну програму отворел городоначалнїк Габури Микулаш Южчик и медзи госцами привитал вецей познати професийни и аматерски ансамбли, шпивацки ґрупи, шпивачох и оркестри, як цо то "Шаришан", "Лучница", "Кандрачовци", а орґанизовани и окремни концерт за младих.

 

"Днї Габури" того року почали з одкриваньом вецей як пейц метери високого памятнїка з бронзи принцови Лаборцови, на брещку Вршок нєдалєко од Габури. Жем хтору у дунчикох принєсли представнїки своїх валалох положена на його основу, як символ єдинства Руснацох. Зоз Сербиї жем положел предсидатель КУД "Тарас Шевченко" Микола Кухар, а при памятнїку, крем културней програми, виведзени и перформанс Ґрупи историйного мечованя "Панї Спиша", зоз соколарами.

 

Други дзень фестивалу бул у знаку спорту, пошвецени 12. Мемориялу Владимира Онуфрака, та на стадионє отримани медзинародни турнир у фодбалє, а вечар на истим стадионє бул и концерт за младих Руснацох. "Днї Габури" витворени з помоцу потримовки Канцелариї Влади Словацкей Републики, з Програми Култура националних меншинох.

 

Дюрдьовчанє на госцованю у Словацкей внєдзелю, 6. юлия, наступели и у Кладзанох, дзе орґанизовани заєднїцки концерт з домашнїма. Госцох з Дюрдьова щиро привитали предсидатель валалу Даниел Лоринц, Женска шпивацка ґрупа, хтора була госц на дюрдьовским Фестивалє жридлового шпиваня и жителє того места.

 

автор:  бхц