Dvaceti Festival duchovnej pisňi

 
Двацети Фестивал духовней писнї
Мишани хор Грекокатолїцкей церкви св. апостолох Петра и Павла з Нового Саду и Руского културно-просвитного дружтва, участвовал на Двацетим, ювилейним Фестивалє духовней писнї, котри 7. новембра отримани у Снїни, у Словацкей Републики.
 

Фестивал, хтори традицийно орґанизує Союз Русинох-Українцох Словацкей (СРУСР), отворел министер за културу Словацкей Републики Даниєл Крайцер, а учашнїкох привитали и о значеню Фестивала бешедовали предсидатель Централней ради СРУСР Петро Сокол и городоначалнїк Снїни Штефан Миловчик.

Под руководительством дириґентки Сузани Ґрос, новосадски хор одшпивал штири духовни композициї, а з иножемства наступели и два хори з України - Закарпатски народни хор з Ужгороду и Мишани хор Катедралней церкви з Хусту. Спред домашнїх, зоз Словацкей, участвовали дзевец хори, чи шпивацки ґрупи.  Попри наступу на Фестивалє, новосадски хор всоботу, у валалє Збой, отримал заєднїцки концерт з младежским фолклорним ансамблом з Ужгороду, а внєдзелю предполадньом шпивал Службу Божу у Грекокатолїцкей церкви Мацери Божей неустающей помоци у Снїни.
Госцованє новосадского хору на Фестивалє духовней писнї у Снїни орґанизовал Союз Руснацох Українцох Сербиї у рамикох сотруднїцтва з главним орґанизатором Фестивала - Союзом Русинох-Українцох Словацкей Републики.

Попри найузшого руководства новосадского хору - о. др Романа Миза, пароха новосадского и Бориса Сакача, директора Хору, на Фестивалє, присуствовали и секретар Союзу Руснацох Українцох Сербиї Славко Джуджар, член Главней ради Союзу Владимир Сакач, а як госци були директор Заводу за културу войводянских Руснацох Мирослав Кевежди, и одвичательни редактор часопису „Шветлосц” Микола М. Цап.
 

(конєц) ммц