Dvojo špivače zoz Serbiji na "Špivoch moho rodu"

Нєшка, 26. септембра, на финалним концерту Осмого дзецинского Фестивала "Шпиви мойого роду", котри ше отримує у Хмельове у Словацкей, як госци наступя и двойо шпиваче з наших местох - Таня Ґовля з Руского Керестура и Иван Недич з Коцура.

Ґовльова и Недич буду представяц Руснацох на закончуюцим концерту тей змагательней акциї у шпиваню дзецох, котру орґанизує Русинска оброда Словацкей. Закончуюци концерт Фестивала "Шпиви мойого роду" за дзеци, отримує ше у рамикох манифестациї Днї хлєба у Хмельове. На поволанку Русинскей оброди Словацкей, одход до Словацкей орґанизує КПД ДОК зоз Коцура, у сотруднїцтве з ОШиҐ "Петро Кузмяк" зоз Керестура, а з потримовку Националного совиту Руснацох, Дочасового орґана општини Вербас и, у фаховей часци, Дома култури Руски Керестур. Вчера, 25. септембра, на чолє з предсидательом ДОК др Михайлом Фейсом, попри наших малих шпивачох, на госцованє до Словацкей одпутовали и члени ДОК, та просвитни роботнїки, науковци и студенти Новосадского универзитету, як и представителє Форуму младих Рускей матки.

Попри участвованя на Фестивалє "Шпиви мойого роду" у Хмельове, домашнї з Русинскей оброди за госцох з Войводини пририхтали и провадзацу програму, дзе предвидзена нащива Прешову и тамтейшей грекокатолїцкей церкви, Бардейову, та Медзилаборцом и його Музею "Ендия Ворголи". Пребуванє у Словацкей плановане по 27. септембер, а у врацаню, на пондзелок 28. септембра, делеґация з Войводини нащива русински центер у Нїредьгази, у Мадярскей, дзе им домашнї будзе проф др Михаїл Карпаль.

Фестивал "Шпив мойого роду" за старших будзе идуцого мешаца, 16. и 17. октобра.У його закончуюцей часци, котра будзе отримана у Старей Любовнї, буду участвовац и два шпивачки зоз Руского Керестура - Весна Надь и Андреа Бучко, а на поволанку Русинскей оброди, госци Фестивала буду чолнїки Рускей матки, як и предсидатель Шветовей ради РРЛ Дюра Папуґа.

зам