Dzeň Rusnacoch označeni i u Mikloševcoch

Дзень Руснацох означени и у Миклошевцох

 

МИКЛОШЕВЦИ – После централней шветочносци у Вуковаре, Дзень Руснацох у Републики Горватскей з пригодну програму внєдзелю, 29. мая, означени и у Миклошевцох. Орґанизатор програми була Рада рускей националней меншини Општини Томповци, у сотруднїцтве з месним КУД „Яким Ґовля”.

 

Державну гимну и Шветочну шпиванку „Браца Русини” одшпивали Женска шпивацка ґрупа КУД „Яким Ґовля” и Хлопска шпивацка ґрупа КУД „Яким Гарди” з Петровцох, котрих на гармоники провадзел Звонко Еделински.

 

У привитним слове предсидатель Кординациї радох рускей националней меншини у РГ Борис Бучко здогаднул на историйну подїю, кед ше пред 185 роками Руснаци приселєли на подруче Сриму и Славониї, а зоз жаданьом же би ше Руснаци ту отримали и у будучносци, присутним повинчовал швето.

 

Спред Општини Томповци винчованку упутел заменїк началнїка Општини Здравко Звонарич, котри дочасово на длужносци началнїка.

 

У музичней часци наступели домашня Женска шпивацка ґрупа, солистки Любов Колєсар, Леся Мудри, дзецински дует Ксения Пап-Мия Бучко, як и Хлопска шпивацка ґрупа з Петровцох.

 

Школяре нїзших класох Подручней школи Миклошевци рецитовали стихи Митра Надьа, котри ше пред 120 роками народзел у Миклошевцох, Штефана Гудака, Агнетки Бучко Папгаргаї, док Леся Мудри пречитала писню покойней миклошевскей поетеси Весни Папуґа Берец. Свою писню „Миклошевска голубица” на програми пречитала и Агнета Бучко Папгаргаї, родом з Миклошевцох.

 

Попри спомнутих Бучка и Звонарича, програму провадзели и член Совиту за национални меншини РГ Звонко Костелник, парох миклошевски и викар славонско- сримски о. Яким Симунович, предсидателька Союзу Русинох РГ Дубравка Рашлянин, а по програми, хтору водзели школяре Анамария и Матей Мудри, за учашнїкох и нащивительох пририхтана вечера и друженє.

 

автор клї