Facebook: Forum mladih Ruskej matki (Srbsko)

Представителє ФМРМ були на концерту фолклорного ансамблу Барвинок зоз Камюнки у Словацкей, хтори ше отримал у Коцуре, 23. авґуста.

Концерт бул наисце удатни, а сала Дома култури полна. Публика була одушевена зоз моцнима гласами шпивачох хторим анї микрофони нє требали. Могли зме чуц даєдни нови писнї зоз Камюнки, алє и писнї хтори ше и ту часто шпиваю. Окремну увагу прицагло тророчне дзивче зоз ансамблу, хторе як даяка стара шпивачка опущено вишло на бину и вжало микрофон. Нє лєм же го вжала, алє и крашнє шпивала.

Мартин Караш ведуци ансамбла и предсидатель Шветового форума младих РРЛ. Вихасновали зме тоту нагоду же би зме зоз нїм побешедовали о актуалних збуваньох и реализациї заключеньох зоз 4. Шветового форума. Дознали зме же ревизия статуту идзе добре, а по єй законченю почнє ше зоз обдумованьом медзинародних проєктох у хторих би участвовали шицки члени Шветового форума. Зоз Руснацами зоз Румуниї комуникация дакус очежана и успорена бо ше одвива прейґ прекладательки. Ище нє знаме покля ше сцигло зоз виробком интернет сайту, цо задлуженє праве делеґациї зоз Румуниї. Иснує проблем у комуникациї зоз младима зоз Подкарпатя, бо ше нє одволую на поволанки прейґ интернету и телефону.