Fenomenalna muzyka až do rana biloho...

"Dorohy Rusyne, z blyzka i z daleka, našy predky nam ne zochabyli ňi hrady ňi zoloty palcaty, ale zdedyli zme po nych bohaťstvo, kotre chočeme i musyme ochraňjati - našy zvyky i tradiciji", takyma slovami pryvytali moderatore večera Ľudmila Sekerakova i Andrij Zeher učastnykiv 3.Rusyňskoj zabavy u Braťislavi. Akcija sja odbyla v subotu v Domi kultury Zrkadlovyj haj v Petržalki, što byla novota oproti perši i druhi zabavi. Molodych ľudi, to ne odradylo a pryšli sja vo velykim počti zabavyti ku svojim.

Moderatorska dvojica, vyparadžena v našych krojoch, slavnostnym tancjom za toňiv špivanky „Krjačok ľaľijovyj“, otvoryla večur povnyj zažytkiv.

Ne lem uvod, ale cila akcija sa nesla v folklorňim duchu, prezentuvanym cez prekrasny špivankyy i taňcji. Vysokoškolskyj folklornyj ansambel Ekonom, obohatyl akciju svojimi vystupiňjami. Malebnyma scenami nas pereveli po šytkych kutoch Sloveňska, najvekšyj aplauz zožali pri prezentaciji folkloru zo Spiša, Šariša i Zemplina.

Pošmileny vystupiňjom vysokoškolakiv a za sprevodom temperamentnych toňiv hudobnoj grupy Problem od Bardijova, zabava odrazu nabrala vysoke tempo. Na parketi začalo byti malo miscja...

A prestavky miži tanečnyma kolami, tak jak je zvykom v rusyňskim kraju, byli vychosnuvany na špivaňja špivanok, kotre ša ne zaobyšli bez harmoňiji i pozvaňja do tancja. Byl to zažytok, na kotryj sja ne zabudat, viďiti tak veľo ľjudi, jak sja spolu bavjat, jak trymut pri sobi. Byl to jeden horjačyj kotel rusyňskoho temperamentu. Podarylo sja nam vytvoryti prijemnú kamaratsku až rodynnu atmosferu.

„Byl to pro mene fenomenalnyj večur, de jem mih strityti i spoznati ďalšich molodych Rusyňiv. Jem rad, že jem ša zučastnil takoj skveloj akciji, kotrom ša podarylo perenesti kus našych tradiciji tu do Bratislavy.“ vyznal sja nam zo svojich pociťiv Martin Dufala, na plečoch kotroho byl hlavnyj ďil odpovidnosti za uspich akciji.

„Už dovho jem sa tak prekrasňi ne zabavjala. Ťišyt ňa, že jem mala možnosť spoznati novych skvelych ľjudi. Aj kid ne jem Rusynka, bylo mi poťišiňjom oboznamity sja z vašyma zvykmi, tradicijami a hlavňi nesputanym temperamentom. Byla to pro mene bars prijemna skusenosť. Budu rekomanduvala šytkym ľuďjom, kotry išti ne mali možnosť spoznati Rusyňiv, žeby pryšli tu miži vas na zabavu. Bylo to velyke predstaviňja, de jem mohla viďiti jak šytky trimut dovjedna,“ ne šporyla slovami uznaňja študentka Katarina z Bitči.

Do skoroho vidžiňja na daľši rusyňski zabavi, kamaraťja !

-sľ-