Festival "Červená ruža" v októbri

Тогорочни Фестивал рускей култури "Червена ружа" будзе отримани 10. и 11. октобра - одлучене вчера, 10. септембра, на схадзки Орґанизацийного одбору Фестивала, котра отримани у керестурским Доме култури.

Як познате, пре финансийни почежкосци, термин тогорочного Штерацец осмого Фестивала рускей култури "Червена ружа" з єй звичайного лєтного, ище скорей преложени за єшень.

У рамикох Фестивала того року буду отримани його штири манифестациї през два днї одбуваня - на соботу, 10. октобра, отверанє вистави и музично-танєчна манифестация дзецох "Червене пупче".

На нєдзелю, 11. октобра, два манифестациї Фестивала буду обєдинєни до єдней програми - "Червена ружа" - змаганє за найкрасши дзивоцки и леґиньски глас шпивачох-аматерох з наших местох и Шветочни концерт. На тогорочней "Червеней ружи" свойо малюнки будзе викладац маляр-аматер зоз Руского Керестура Любомир Бабинчак, хтори ше, после длугшей павзи, ознова активовал у тей роботи.

На "Червеним пупчу" и того року буду виведзени до дванац нови композициї за дзеци, чийо авторе нашо уж афирмовани композиторе и писателє, алє и дзепоєдни нови, медзи нїма и сами дзеци.

Як винєсли присутни представителє КУД, та спрам спознаньох орґанизаторох, и попри очежаней пенєжней ситуациї по КУД пре финансованє приходу до Керестура, на "Червеним пупчу" наступя дзецински музично-танєчни ансамбли з векшини наших местох.

За "Ружову" традицийну манифестацию "Червена ружа" - змаганє за найкрасши дзивоцки и леґиньски глас уж приявени 12 шпиванки, з котрима ше млади шпиваче з наших местох буду змагац за кошарку червених ружох и чобольов.

Приявени тройо млади змагателє-шпиваче з Коцура, тройо зоз Керестура, двойо з Вербасу и по єдно зоз Нового Саду, Суботици, Дюрдьова и Бачинцох, як солисти и дуети, з тим же число змагательох ище нє конєчне.

Шпивачох за глас будзе провадзиц Вельки народни оркестер керестурского Дома култури, а за виводзенє нових композицийох на "Пупчу" будзе зняти звучни матрици.

З оглядом же, як гварене, тидзень пред, лєбо тидзень после "Ружи" будзе отримана манифестация "Жатва" у Коцуре, та же би ше програму нє повторйовало, на Шветочним концерту 11. октобра од наших ансамблох будзе участвовац лєм Мишани хор керестурского Дома култури, хтори одшпива предложени шветочни шпиванки, и танєчни ансамбл Дома култури.

Як догваряне и на лєтних розправох о наших фестивалох, а потвердзене и на вчерайшей схадзки Орґанизацийного одбору "Ружи", свою єднорочну роботу музични, танєчни и шпивацки ансамбли наших КУД представя на коцурскей "Жатви".

Найвекшу часц програми Шветочного концерта на "Ружи" пополня госци з иножемства - Фолклорни ансамбл "Капущанчан" з Капушанох коло Прешова, зоз Словацкей, а после їх наступу, предвидзене преглашованє побиднїкох у змаганю за найкрасши глас на тогорочней "Ружи".

Манифестациї, односно програми 48. фестивала рускей култури "Червена ружа", з оглядом на єшеньску хвилю, буду отримани у Велькей сали Дома култури, а у технїчним орґанизованю поможе и РТВ Войводини, гварене на вчерайшей схадзки Орґанизацийного одбору. Як предвидзене, РТВ - редакциї и Радия и Телевизиї по руски, буду знїмац шицки манифестациї "Ружи", а и Радио и ТВ, директно будзе преношиц нєдзельово програми - змаганє за найкрасши глас и Шветочни концерт.

И попри дотерашнїх контактох орґанизатора коло програмних змистох "Ружи", после схадзки присутним зоз наших КУД такой подзелєни прияви за участвованє з їх точками, а тим цо нє присуствовали на схадзки, прияви буду послати цо скорей, так же пошвидко буду позната и конкретни програмни змисти каждей тогорочней "Ружовей" манифестациї.

(конєц) зам