Festival "Kocurska žatva 2010"

 

Концерт з нагоди Фестивала "Коцурска жатва 2010"
З нагоди тогорочного Фестивала жридлового фолклору войводянских Руснацох "Коцурска жатва", вчера вечар у Доме култури у Коцуре отримани Концерт танєчних ансамблох з наших културно-уметнїцких дружтвох. У програми участвовали фолклорни ансамбли зоз седем наших културних здруженьох - Виводзацки ансамбл Дома култури Руски Керестур з хореоґрафями "Ой верше мой верше" и "Швето на Карпатох"; КУД "Петро Кузмяк" з Нового Орахова з "Леґиньскима танцами" и "Венчиком руских танцох", а КПД "Карпати" з Вербасу з танцами "Гуцулка" и "Гопак".

КУД "Тарас Шевченко" з Дюрдьова наступел з хореоґрафиями "Танцовала бим я" и "Горнї танєц", РКПД Нови Сад з танцом "Металицю" и хореоґрафию "На танцу на Шаришу", а КПД "Дюра Киш" зоз Шиду ше представел з танцами "Дзивоцки полки" и "Баришивска полка".
 

КУД "Жатва" з Коцура, хторе було и орґанизатор Фестивала, односно того концерту, наступело з хореоґрафиями "Куцкуруши" и "Ей, у Ганїчки на дворе".  Програма виведзена у двох блокох, дзе ансамбли виведли по єдну хореоґрафию, а медзи блоками наступали шпивацки ґрупи КУД "Жатва" - Руска женска, Руска дзивоцка и Мадярска мишана шпивацка ґрупа.

Пред Концертом, у голу Дома култури академик Юлиян Тамаш отворел виставу пейзажох Ромка Макая, маляра-аматера з Коцура, а на Концерту з нагоди Фестивала "Коцурска жатва" присуствовали члени нашей заєднїци у найвисших Републичних и Покраїнских орґанох, чолнїки и члени нашого Националного совиту, представителє з културного и явного живота Руснацох, вербаскей општини и Коцура.
 

Отримованє Концерту з нагоди Фестивала "Коцурска жатва 2010" финансийно помогли Национални совит Руснацох, Скупштина општини Вербас, Покраїнски секретарият за културу и Покраїнски секретарият за управу, предписаня и национални заєднїци. 
 
(конєц) цики