Firis Hajnalka: Prezviska maďarskoho pochodzeňa pri bačvansko-srimskich Rusinoch (1)

 
(Фирис, Гайналка. Презвиска мадярского походзеня при бачванско-сримских Русинох.

Budapest:  ELTE, Ukrán Filolόgiai Tanszék – Argumentum. 2012)
 
Русинистична литература хтора облапя тематику презвискох при Руснацох у Сербиї / Войводини и Горватскей нє велька. Найзначнєйшу референцу хтора зоз своїм змистом обезпечує солидни увид до тей тематики представя статя «Руски презвиска и назвиска Руснацох у Югославиї» Миколи М. Кочиша (Линґвистични роботи, 1978, 187-218). Презвиска при бачванско-сримских Руснацох у своїх роботох обробйовали и Павло Чучка (напр. «О чим шведочи антропонимия войводянских Руснакох», Шветлосц, 1973/1, 95-105), Иштван Удвари (напр. «Фонетичне адаптованє мадярских словох у бачваньско-сримским руским язику», Творчосц, 11, 1985, 40-62), Мирон Жирош (напр. «Цо мученьски (Мадярска), керестурски и коцурски (Югославия) презвиска и назвиска бешедую», Studia Ruthenica, 3, 1992-1993, 106-118), Леона Гайдук, („Антропоними хлопох и женох и патроними Руснацох Шиду зоз їх назвисками“, Iz multijezičke Vojvodine: Zbornik Pedagoškog zavoda Vojvodine, 7, 2011, 125-137), Михайло Фейса (“Мена и презвиска войводянских Руснацох”, Slavica Tartuensia IX, 2011, 213-221), як и Гайналка Фирис (напр. «Презвиска мадярского походзеня при бачванско-сримских Руснацох», Русини / Руснаци / Ruthenians (1745-2005), 2. том, 2008, 210-228). На Оддзелєню за русинистику Филозофского факултета Новосадского универзитета одбранєни и два дипломски роботи хтори дотикаю тоту тему – Власни мена и презвиска у Шиду Анити Ґовля (2008) и Гунґаризми у руским язику Сенки Бенчик (2012).
 

Кнїжка Гайналки Фирис Презвиска мадярского походзеня при бачванско-сримских Русинох представя докторску дисертацию одбранєну 2010. року на ЕЛТЕ БТК у Будапешту у Линґвистичней докторскей школи на Славистичней линґвистичней програми на Институту за славистику и балтистику. Ментор дисертациї и редактор кнїжки проф. др Андраш Золтан. Слово о першей интеґралней кнїжки-моноґрафиї на бачванско-сримскей вариянти русинского язика Русинох / Руснацох у Бачкей и Сриму (у Сербиї и Горватскей) нє лєм о руских презвискох, алє вообще о єдней ономастичней теми спатреней зоз шицких бокох.
 

Моноґрафию творя шлїдуюци 10 поглавя: 1. Увод: О бачванско-сримских Русинох – їх историї, язику и презвискох як часци язичного скарбу (од 9. по 16. бок); 2. Поняце билинґвизму и линґвистичней интерференциї при толкованю русинско-мадярского билинґвизму при предкох бачванско-сримских Русинох як єден зоз важних факторох наставаня презвискох мадярского походзеня при нїх (17-22); 3. Фамелийни презвиска (23-32); 4. Етимолоґия презвискох (33-60); 5. Етимолоґийна  анализа презвискох мадярского походзеня при бачванско-сримских Русинох (61-259); 6. Презвиска мадярского походзеня при Русинох на Горнєй жеми скорей приселєня предкох бачванско-сримских Русинох на Долню жем (260-285); 7. Фамелийни назвиска (286-289); 8. Етимолоґийна анализа фамелийних назвискох мадярского походзеня при бачванско-сримских Русинох (290-311); 9. Чи презвиска мадярского походзеня при бачванско-сримских Русинох плод спонтаного наставаня презвискох, чи спонтаних – природних пременкох, чи плод їх мадяризациї? (312-320); 10. Заключенє (321-334).   
 

Формованє презвискох у Мадярскей при Русинох / Руснацох почало ещи у другей половки XIII вика, а закончене є концом XVI вику, односно XVIII вику, кед записованє презвискох постало обовязне. Хаснованє презвискох уведзене пре попис жительства у держави и пре порцийни обовязки жительства. Цар Йозеф II 1787. року принєсол декрет о обовязним и стабилним хаснованю презвискох, а цар Франц I 1814. року принєсол декрет зоз хторим забранєна пременка презвискох без державного дошлєбодзеня (б. 31). Мадярски язик бул официйни язик Русином по 1918. рок и прето по тот рок, по авторки, пановал русинско-мадярски билинґвизм.
 

О тим же значна часц презвискох виведзена и фиксована ещи на Горнїци, скорей як ше предки бачванско-сримских Русинох / Руснацох приселєли до Бачкей, шведоча презвиска за хтори би ше могло повесц же су мадярского походзеня, а єст их, окрем при бачванско-сримских Русинох, и у Прешовским краю у Словацкей, и на Лемковини у Польскей, и у Закарпатскей обласци України – у єднакей форми, або у фонетичней, чи морфолоґийней вариянти.
 

Од вкупного числа презвискох при бачванско-сримских Русинох, хторе виноши 594, др Гайналка Фирис у моноґрафиї анализовала 299 презвиска мадярского походзеня (цо представя 50,3 % зоз вкупного числа). То шлїдуюци презвиска: Абодич, Абодї, Аладич, Алекси, Андич, Апро, Арва, Арвай, Арвальчик, †Арновски, †Баґоль, Баков, Балаш, Балащак, Балїнт, Балоґ, †Балтар, Барат, Барач, Барна, †Бароти, †Бата, †Береґ, Берек, Беречан ~ Беретян, †Беринь, †Бернадт, Берци, Бесерминї, Бесерминьски, Бики, Биреш, Биркаш, †Боґар, Бодваї, Бодваньски, Боднар, Боднарчик, †Боднарчук, †Бодонї, Бодянєц, †Болвари, Бораї, Бочкор, Будински, Буша, †Вадаси, Вадаски, Варґа, †Вашархелї, †Вашари, Вашаш, Вашкай, Венчельовски, Вереш, Верпеци, Винаї, Виславски, Гайнал, Гаргаї, †Геґедиш, Гайдук, Горняк-Данко, Гусош, †Ґадняї, Ґаднянски, Ґажо, Ґайдош, Ґача, †Ґебде, †Ґерамбельски, Ґерембелї, Ґовля, Ґоч, Ґрайцар, Ґубаш, †Ґуляш, Дайко, Данчо, †Деак, Деметер, Деметрович, †Демойки, †Дороцки, Дорокази, Дудаш, Дула, Дулич, Дуло, Дюранїн, Дюрань, Дюраньов, †Жиповски, Жирош, †Збудински ~ †Збуцински ~ †Сбуцинь, Еделински, †Еден, Ежденци ~ †Ижденци, Емеди ~ Емейди, †Енчик ~ †Єнчик, Ерделї, Еслар, Ешток, Калаї, Калмар, Капушински, †Катаницки, Катона, Качмарчик, Кашаї, Кашовски, Кевежди, Керекярта, †Керестури, †Керестурик, †Керестурски, Кетелеш, Кечкеш, Кираль, Киш, Кишголи, Кишґеци, †Кишмаря, Кишмитро, Кишондер, Кишпетьо, Кишрацик, Кишюгас, Кишянков, Ковач, Колбас, Колошняї, Кондаш, Корпаш, Кочиш, Кошарко, Крайцар, †Кувежди, †Курти, Кучмаш, Куруц, Лабош, Ланцош, Лацко, †Леведняй, Лендєр, †Липчай, Ловас, Маґоч, †Маґяр ~ †Мадяр, Мади, Майорош, Макаї, Макиш, †Малацканїн, Малацко, Маньош, †Мартони, †Мархак ~ Mаргак, Медєши, Мезеї, Мелеґ, Микловш, Михалько, Михальовски, Молнар, Монар, Мункачи, Мученски, Надь, Надьлукач, Надьмакаї, Надмитьо, Надьордя, Надьпопов, Надьфеї, †Нїритчански, †Нїрчак, Нїряк, Новта, Нота, Няради, Олах, Орос, Паланчаї, Палинкаш ~ Палєнкаш, Пап, Папандриш, Папгаргаї, Папданко, Папданчо, Папдюрань, Папдюрдес, Паплацко, Папянко, †Папянски, †Парлаґи, Парошкаї ~ Парошкай, Пастовнїцки, †Пельваш, Пельга, †Петковски, Петьо, Петко, Петковски, †Пешта, Планкош, Провчи, Пушкаш, Раґаї, †Раґияш, Радванї, Радвань, Рац, Рацмиа, Рацпети, Ройко, Роташ, Рускаї, Сабадош, Сабо, Сабол, Сакач, Салонски, Салонтаї, †Салончански, †Санич, Сеґеди, †Секе, Сендерак, †Сенерак, Сивч, †Сюч, Силадї, Такач, Тамаш, †Томаш, †Таран, †Тарди, †Татар, Тимко, Тоби, Тодорович, †Толнаї, †Томорски, Торжич, Торма, Тот, †Тусинко, Уйфалуши, Фа, Фаркаш, Феєш, Фейди, Фейса, Фекете, †Фердош, †Ференчак, †Фиґецки, Фирис, Холошняй, Циберей, Цобор, Чакан, Чельовски, Чижмар, Чобан, Човс, †Чокан, Чордаш, †Чорей, Шайтош, Шандор, Шанта, Шарик, Шима, Шимко, Шовань, Шовш, Югас, Югик, †Яков, Якши, Янканїн, Янкань, Янканьов и Янчик.

Part 2 :  http://www.rusyn.sk/index.php?ID=8714&l=sk

Проф. др Михайло Фейса