Gedele (Maďarska) - Švetova rada RRL

ҐЕДЕЛЕ (МАДЯРСКА)  - ШВЕТОВА РАДА РРЛ
Пририхтованє за Конґрес
Предсидатель Шветовей Ради Руснацох/Русинох/Лемкох (РРЛ) Дюра Папуґа, за нєдзелю, 22. мая, заказал 8. зашеданє Шветовай Ради у месце Ґеделе, при Будапешту.
На дньовим шоре векшином питаня вязани за закончуюци пририхтованя за Єденасти Шветови  конґрес РРЛ и Пияти Шветови форум младих РРЛ, котри, тиж у Мадярскей, буду отримани штредком юния того року. 

На нєдзельовим зашеданю, медзи иншим, Шветова рада принєше програму, место и час отримованя Єденастого конґресу, число делеґатох Конґресу и Форуму младих, одредзи предсидательох конґресних комисийох, та Мандатней и Виберанковей комисиї Конґресу.

На дньовим шоре Ради и пременки Статута Шветового конгресу РРЛ, розпатранє приєму до членства Шветового конґресу русинскей орґанизациї „Русински приятелє Карпатскей Руси” з Москви (Русия), активносци орґанизацийох-членїцох Шветового конґресу, як и порушованє веб-сайту Шветового конґресу.

На нєдзелю Дзень Русинох у Мадярскей
Националне швето Русинох у Мадярскей, у орґанизациї Вседержавней Русинскей самоуправи Мадярскей, будзе отримане на нєдзелю, 22. мая, у месце Ґеделе, при Будапешту.

Шветочносц почнє зоз Службу Божу у Премонтрейскей каплїци у Ґеделу, на церковнославянским язику, а будзе предлужена у просторийох Универзутету Святи Иштван.

Присутних привитаю заменїк руководителя Оддзелєня националних вязох Министерства державней самоуправи и правди Мадярскей Антал Паулика и предсидателька Вседержавней русинскей самоуправи Вира Ґириц.

Националне швето Русинох у Мадярскей будзе означене и зоз Шветочним концертом,  на хторим буду участвовац дзеци з основних школох и дзецинских заградкох з русинских меншинских центрох у Комлошки и Мучоню, як и женски хори з русинских местох.

мсл