Greckokataolycka cerkov na Rovžak-tere

Греко-католичеська церков на Ровжак тере
(страниці исторіи)
 
Существованіє католикув візантій­ського обряда у Буда­пешті мож раховати вуд кунця середньовіччя. Точної даты сього не є , бо у тот час католики ищи не обьєдинилися у церковну общину. У другуй половині XIX стороччя многі жителі провінції перебралися у Будапешт, обы обеспечити своє существованя. Дякувучи сьому заселеню, у 1890 роках уже зачалося двиганя, из котрого затым образовалася община. 6 януара 1895 рока уже были выбрані представителі, котрі сформовали устав общины.
 
Тогды ищи діла католикув візантійського обряда не было церквы. Літургії проводилися у універзитетськуй церкви. 30 юнія 1898 рока Столична Рада приняла греко-католичеську общину пуд своє покровительство, беручи на себе и її матеріалну поддержку. Одновременно організаторы подали прошеніє и на церков, обы мож было сформовати релігіозноє житя общины. Они хотіли дустати церков на площади Сирот. Сися невелика церков была побудована по проекту Дёзё Ціглера межи 1875-1880 роками. Так як церков, розрахована на 400 чоловік, уже была мала діла римо-католикув. и коло неї будовалася церков св. Ержибеты по проекту Імре Штейндла, вірники надіялися дустати право хоснованя малої церкви.
 
У сисі рокы площадь Сирот была переимено­вана на площадь Ровжак.  17 августа 1904 рока Міністерство   Внутренных   Діл   удовлетворило прошеніє, и 8 януара 1905 рока по указу Ференца Васарі Колосиума, естергомського кардинала, была організована   Будапештська   греко-католичеська парохія. Резиденціи парохії тогды ищи не было. Квартира сященника находилася на улиці Роттен-біллер. Будованя теперішньої парохії закончилося у 1929 році. Она розположена зліва и справа вуд церквы.   У   сись   час   зачалися   перебудовы   у внутреннюй части,  согласно канонам восточної церквы. Оформленіє церквы было поручено у 1932 році Еммануїлу Петрашевському, котрый робив из Иштваном Токачом. Престольный образ, изобража­ющий Матерь Божу и два основні образы иконо­стаса и также „Тайну вечерю" написав знамый малярь Игнацій Рошкович.
 
У II Світовуй войні церков была повреждена. Сисі поврежденія были устранені, кромі єдного, што находиться за образом Матери Божої. Послі II Світової войны церков была двічі реставрована: у 1975 році и у 2001 році.