Grekokatolickyj katedralnyj chor z Prjašova vystupiv u Prazi

Grekokatolickyj katedralnyj staroslavjanskyj chor sv. Joana Krestiteľa z Prjašova je najstaršim spivackym chorom medži grekokatolickyma i pravoslavnyma zborami na Sloveňsku.

Joho vznik sja datuje po roci 1865, koli byv založenyj na osnovi vystupľiňa bohoslovoskoho choru Harmonia z Užhoroda v Prjašovi pid vedžiňom znamoho dirigenta Konštantina Metozonskoho. Chor po roci 1968 obnoviv svoju činnosť pid vedžiňom uznavanoho chormajstra Gabriela Mirošaja a do nedavna ho viv pan František Šestak.

Peršyj raz v joho istoriji ho u sučasnosti vede žena, Valika Hricovova z Prjašova. Chor od svojoho obnovľiňa v časi Dubčekovoj jari absolvovav vyše 1.200 koncertiv a vystupľiň, okrim inšoho i za hranicjami republiky: spivav v Maďarsku, Poľsku, na Ukrajini, v Serbsku, Talianksu, spivav Svjatijšomu Otcju u Vatikani, dalej vo Francii, Švajčarsku, Portugalsku a samo sobov i u susidnym Česku.

Po dovhim časi sja znova čerez vikend predstaviv v Českoj republici, kde pid dirigentskov taktovkov Valeriji Hricovovoj spivav v katedraľnym grekokatolickym chrami sv. Klimenta v Prazi. Svij pobyt začav v pjatnicu večur vystupľiňom vo Velikoj sali Mistskoj knižnici holovnoho mista Prahy, de spivav s dalšima trjoma chorami. Pro našich rodakiv žyjučich v holovňim misťi ČR mav poťim v subotu poobidi okremyj koncert v katedralnym chrami sv. Klimenta nachadžajučim sja nedaleko Karlovoho mosta.

Cerkov tleskala staroslavjanskym pisňam bohatoho repertoaru pririchtovanym pro pražske publikum. V neďiľu doobidu tam spivav toržestvenu Službu Božu, kotru služiv pomičnyj jepiskop pražskoho exarchatu Evgen Kočiš vjedno s prijašivskym parochom Gabrielom Sekeľom a prorektorom Prijašivskoj univerzity o. Petrom Šturakom. Členove choru pozdravili i emeritnoho vladyku Ivana Ľavinca, žyjučoho u Prazi, kotryj pochodiť z Podkarpatskoj Rusi a do roku 1950 byv blizkym spivpracovnikom jepiskopa Pavla Gojdiča.

Treba viriti, što kontakty s našyma rodakami žyjučimi abo pracujučima v Prazi buduť dobudučna naberati na intenziti. Pro informaciju treba dodati, že v Prazi sja každyj deň služať sv. liturgie pro grekokatolikiv a tak Rusiny majuť maximalno postarane o rozvitok duchovnoho a cerkovnoho žyvota.

-PKm-