Gubernator Zakarpatskoj oblasci i Verchovna rada Ukrajiny potrimaju Kongres

Ґубернатор Закарпатскей обласци и Верховна рада України потримаю Конґрес

Предсидатель ШР з ґубернатором Александром Ледидом

Ґубернатор Закарпатскей обласци України Александер Ледида и Верховна рада України технїчно и финансийно потримаю отримованє дванастого Шветового конґресу Руснацох/Русинох/Лемкох (РРЛ), хтори од 12. по 14. юлий того року будзе отримани у Мукачове и Сваляви - потвердзене членом Шветовей ради (ШР) Конґресу всоботу, 11. мая у України.
 
Пред порядним, седмим зашеданьом ШР РРЛ, хторе прешлей соботи отримане у Мукачове на Подкарпатю, члени Ради, на чолє з єй предсидательом Дюром Папуґом, бешедовали з ґубернатором Закарпатскей обласци України (зоз шедзиском у Ужгородзе) Александром Ледидом, як и з депутатом у Верховней ради (ВР) України Иштваном Ґайдошом, котри и секретар Комитету ВР України за питаня людских правох, национални меншини и медзинационални одношеня.
 
Як за Рутенпрес гварел Дюра Папуґа, ґубернатор Ледида и депутат Ґайдош потвердзели и же з остатнїма законскима предписанями русински язик припознати у України, та з тим и Русини, а на попису жительства у України, на єшень того року, нї за кого нє будзе окремна одреднїца о националней припадносци, алє будзе охабене празне место, дзе кажде годзен уписац якому народу, односно националней меншини припада.
 
Кед ше за припадносц даєдней националней меншини вияшня найменєй 10 одсто гражданох єдного места, та на висше - општини, округу, обласци итд., язик тей меншини ше будзе службено хасновац у тей єдинки локалней управи, преноши Папуґа толкованє Закона о основох державней язичней политики у України, яке дал Александер Ледида. Закон принєшени прешлого року.
 
Александер Ледида з членми ШР РРЛ бешедовал на шветочносци з нагоди означованя добросушедских одношеньох медзи Україну и Словацку, хтора всоботу отримана у Вишним Нємецким, нєдалєко од Ужгороду. На шветочносци участвовали представителє по осем погранїчних општинох з України и Словацкей.

автор:  зам