Hlasa še za jednu spomedzi 6 ľistinoch

 

На ютре, нєдзелю 6. юния, буду отримани перши нєпоштредни  виберанки за национални совити националних меншинох у СербиЇ, дзе и Руснаци здобули право нєпоштредно, директно виберац свой Национални совит.

За ютрейши виберанки за Национални совит Руснацох кандидаовани 6 виберанково лїстини, на хторих вєдно 90 кандидати за членство до нового Националного совиту.

На виберанкох за национални совит, заокружує ше шорне число опрез виберанковей лїстини на гласацким лїстку.

Гласацки лїсток за Руснацох будзе орамиковани з помаранчецову фарбу.

За национални совит Руснацох утвердзени шлїдуюци виберанквого лїстини: под числом 1 “Руска лиґа-Олена Папуґа”, чия ношителька Олена Папуґа з Нового Саду, дзе 17 кандидати; под числом 2 лїстина “За народ свой” Рускей демократичней странки ношителя Мирослава Бесерменя зоз Сримскей Митровици, дзе 12 кандидати; лїстина под числом 3 “Вєдно за Руснацох”, чий ношитель Славко Рац Цацо з Руского Керестура, дзе 19 кандидати; лїстина под числом 4 “Руска младеж”, чий ношитель Сашо Палєнкаш з Руского Керестура, дзе 11 кандидати; лїстина под числом 5 “Руска матка”, чий ношитель Дюра Папуґа з Руского Керестура, дзе 19 кандидати и под числом 6 “Сримска лїстина” хтора нє ма ношителя, дзе 12 кандидати за членох до нового Националного совиту Руснацох.

Виберацки места за вибор националних совитох ютре буду отворени на 7, а заварти истого дня на 20 годзин.

Гласанє будзе окончене особнє и тайно, лїстини ше будзе уруцовац вєдно, до єдней шкатули за шицки меншини, та и лїстину за Руснацох, означену з помаранчецову фарбу.

Спрам того кельо єдна лїстина достанє гласи - пропорцийно числу освоєних гласох - до Националного совиту буду вибрани кандидати спрам їх рядошлїду на єдней лїстини, односно по Д’Онтовей системи, як и за виберанки до Републичней, Покраїнскей и локалних скупштинох.

Нєурядово резултати буду познати скорей, а урядово резултати виберанкох, спрам информациї з ЦВК, буду сообщени на стреду, 9. юния.

На нєдзелю, 6. юния од 20 г., Министерство за людски и меншински права и ЦВК у Палати “Сербия” у Беоґрадзе орґанизую прес-конференцию з нагоди виберанкох за национални совити националних меншинох, а од 20 до 23,30 г., новинаром нас истим месце буду доступни шицки информациї вязани за виберанки.

(конєц) зам