Horvatska: Pozdrav rovňini na "Mikloševcoch 2014"

 

Поздрав ровнїни на ”Миклошевцох 2014”

 

Прешлого викенду, 30. и 31. авґуста, у Миклошевцох, у Горватскей, отримана Двацец дзевята Културна манифестация "Миклошевци 2014", а главна часц манифестациї отримана внєдзелю, кед после дополадньовей Служби Божей у грекокатолїцкей церкви Рождества Пресвятей Богородици, пополадню перше отримана програма "Поздрав ровнїни", а вечар концерт "Писньо моя".

 

Нєдзельова пополадньова програма почала зоз шветочну писню Руснацох у Горватскей "Браца Русини", хтору одшпивал квартет домашнього КУД "Яким Ґовля", а потим бину прикрашели наймладши - члени дзецинскей танєчней ґрупи КУД "Яким Ґовля" з Миклошевцох, як и Женска шпивацка ґрупа спомнутого Дружтва, хтора наступела з рускима шпиванками.

 

Здруженє женох зоз Старих Янковцох виведло мадярски народни писнї и танци, нашо шпиванки виведла мишана шпивацка ґрупа з Винковцох, а аматере КУД "Яким Гарди" з Петровцох ше представели з руским народним танцом. На програми "Поздрав ровнїни" шпивала и дзивоцка ґрупа Дружтва "Руснак" з Петровцох, док Шокецке коло виведли госци з Томпоєвцох, з КУД "Младосц".

 

Шпивацка ґрупа и тамбурови оркестер Дружтва Руснацох з Осиєку за швето у Миклошевцох пририхтали даскельо руски шпиванки, а КУД "Осиф Костелник" з Вуковаре наступел зоз хором и фолклорну ґрупу.

 

автор:  рим