Horvatska: U maju vyberanki

Горватска:  У маю виберанки
Виберанки за ради националних меншинох на подручу Републики Горватскей, буду отримани 22. мая, та пририхтованя почали и у рускей националней меншини. Координация рускей националней меншини розписала Поволанку, з хтору поволує шицких младих котри напольнєли 18 роки, же би ше уписали до виберацкого списку.

Тих дньох, по наших местох почнє и предкладанє кандидатох за виберанкову лїстину, и за тераз, до општинских радох буду виберани 9, а до городских и жупанийских 25 члени.
Уставни закон Републики Горватскей о националних меншинох и їх правох, каждей националней меншини оможлївює орґанизованє и на политичних основох, алє меншина муши сполнїц одредзени условия, односно орґанизованосц завиши од числа виберачох.

За виберанє членох до општинских радох, до виберацкого списку муша буц уписани найменєй 200 вибераче. Тото условиє сполнюю нашо два валали - Миклошевци и Петровци.
За вибор до городских радох, до виберацкого списку муша буц уписани найменєй 250 вибераче, а тото условиє сполнюю лєм Руснаци у Вуковаре.
За виберанє членох до Жупанийскей Ради потребне же би на подручу Жупаниї було вецей як 500 виберачох, а тото условиє Руснаци сполную лєм на подручу Вуковарско-сримскей жупаниї.

У других варошох дзе у векшим чишлє жию Руснаци - у Заґребу и Осєку - на попису єст лєм дацо вецей як сто Руснацох, и вони маю можлївосц виберац свойого представнїка.
До тераз, шицки ради и представнїки могли сновац Координацию, хтора була и найвисши орґан, односно политични представитель Руснацох у Горватскей.

(конєц) дюлї