Hoscovala Kyčera

 

Госцовала "Кичера"
Позарядово удатни цаловечарши концерт, вчера вечар у Руским Керестуре отримал найпознатши и найвекши Лемковски ансамбл писнї и танцу "Кичера" з Леґници, зоз Польскей. У програми, составеней зоз, як гварели госци - лемковско-руснацких шпиванкох и танцох, участвовали коло 40 члени танєчного ансамблу, дзивоцки ґрупи шпивачох, дуети и солисти, оркестер, а шицки танци провадзела и векша ґрупа шпивачох.

"Кичери" то було друге госцованє у Руским Керестуре, понеже на нашим Фестивалє "Червена ружа" наступали 1999. року, на цо у привитним слове здогаднул и предсидатель Рускей матки Дюра Папуґа, як и руководитель ансамбла з Польскей Юрко Старински.
 

Старински на початку Керестурцох упознал з кратшу историю Лемкох у Польскей, насампредз же су до тей часци нєшкайшей Польскей, до Шлезиї, одкаль ансамбл приходзи, насилно розселєни после Другей шветовей войни, у познатей сталїнистичней операциї "Висла". До пред коло 20 роками нє мали анї свойо школи, културу, була им забраньована грекокатолїцка и православна вира, було нєдошлєбодзене чувац свою традицию.
 

Дзекуюци пременком, ансамбл "Кичера" на рок означи 20 роки свойого постояня, а до тераз, попри велїх жемох у Европи, госцовал и у Мексику, Перуу, Китаю, Индиї, Индонезиї, у Израилу, Арабских емиратох и, як гварел Старински, вшадзи госцовали и як Руснаци з Польскей.

Же то наисце реномовани и познати ансамбл, гутори и податок же од УНЕСК-а достал сертификат ЦИОФ, котри подобним ансамблом дава Медзинародни совит фолклорних орґанизацийох, ансамблох и фестивалох.
 

Попри ансамблу, "Кичера" источасно и Здруженє Лемкох, котре ше може попишиц з найвекшу библиотеку лемковских и русинских виданьох у Польскей, стара ше о националним идентитету Лемкох, орґанизує рижни програми, науково сходи и манифестациї, як и єден з найвекших медзинародних фестивалох у тей часци Европи - Фестивал националних меншинох, дзе госцовал и керестурски Дом култури, а Старински директор того фестивала.

На бини Дома култури Руски Керестур, пред наисце красним числом публики, Руснаци з Польскей одтанцовали вецей танци, як цо то карички, чапаши, штаєрки, полки, викруцани, потресани танци, венчик танцох и шпиванкох зоз шицких крайох дзе жию Лемки, представели рижнородносц лемковского облєчива, за цо достали и длуги апалузи публики.
 

На концу, Дюра Папуґа у мено домашнїх - Националного совиту Руснацох, Школи "Петро Кузмяк", Рускей матки и Дома кулури, ансамблу уручел нашо музични и друковани виданя и шицки вєдно, з публику, одшпивали "Червена ружа трояка" и Многая лїта. Вчера през дзень, за їх библиотеку, вецей нашо кнїжки и виданя подаровало им и НВУ "Руске слово", прейґ Дописовательства у Руским Керестуре.
 

Ансамбл векшином творя млади Лемки з Леґници (коло 110 000 жительох) и околних местох, тераз ма коло 70 членох, а до Сербиї пришли штредком того мешаца, дзе од 13. по 17. августа участвовали на Медзинародним фестивалє фолклорних ансамблох у Пироту.
 

После госцованя у Пироту, од 18. по 22. август госцовали у Греческей, же би у врацаню до Польскей, пондзелок вечар сцогли до Руского Керестура, а ютредзень, 24. августа, пред концертом, нащивели и музейну постановку у Замку и рускокерестурску церкву.

(конєц) зам