Hrvatska: Rezultati viberankoch

 

Внєдзелю, 10. юлия, на подручу цалей Републики Горватскей (РГ) отримани виберанки за ради шицких националних меншинох, так же и Руснаци у РГ виберали своїх представительох до тих орґанох национално-културней автономиї.

На уровню цалей держави, право гласа мали коло 370 тисячи гражданє - припаднїки националних меншинох, а на гласанє вишли лєм коло коло 30 тисячи, односно 8 одсто од уписаних.

Спрам Закону о националних меншинох, Руснаци виберали своїх Представнїкох у Заґребу и Осєку, Городску раду у Вуковаре, општински ради у Миклошевцох и Петровцох и Раду рускей националней меншини на уровню Вуковарско-сримскей жупаниї.

У Заґребу, од уписаного 131 виберача, на гласанє вишли 44 особи. Спрам резултатох гласаня, дотерашнї Представнїк Руснацох у Заґребу Ириней Мудри, тоту длужносц будзе окончовац и наступни 4 роки, понеже  достал 34 гласи. Його процивкандидати Олґица Мудри и Юлиян Планчак, на нєдзельових виберанкох достали вельо менєй гласи.

У Осєку, од уписаних 93 Руснацох, на гласанє вишли лєм 10 особи, алє без огляду на таки мали процент тих цо гласали, за Представительку Руснацох у тим городзе вибрана Агнетка Балатинац, хтора нє мала процивкандидата.

У Миклошевцох, дзе ше виберало членох Општинскей ради, на виберацким списку були 277 особи, а на гласанє вишли 49, лєбо коло 18 одсто.

Спомедзи 20 предложених, до Ради вибрани Борис Бучко, Мирослав Гайдук, Дюра Бики, Витомир Мудри, Златко Гирйовати, Славко Ждиняк, Мирослав Лїкар, Сандра Лїкар, Деян Лїкар и Звонко Ждиняк.

Руснаци у Петровцох тиж виберали членох Општинскей Ради. На виберацким списку бул 431 гласач, а на гласанє вишли 73 особи, лєбо коло 17 одсто.

До Општинскей ради Петровци вибрани Марияна Джуджар, Томислав Рац, Даниєл Вашаш, Михайло Голик, Янко Сопка, Йоаким Вашаш, Петар Киш, Звонко Костелник и Желько Костелник. З оглядом же двоме кандидати маю исте число гласох, за дзешатого члена остатнє слово пове Державна виберанкова комисия.

Петнац членох Городскей ради Руснаци виберали лєм у Вуковаре и спомедзи  коло 600 уписаних до виберацкого списку, на гласанє вишло коло 14 одсто.

До Городскей ради Руснацох Вуковар  вибрани Зденко Бурчак, Лела Дїтко, Мирослав Дїтко, Блаженка Дудаш, Владо Русин, Мирко Дорокази, Мирко Пап, Звонимир Барна, Наталия Гнатко, Звонко Рац, Мария Такач, Владо Мудри, Славко Рамач, Наталия Барна и Кирил Гарди.

Руснаци внєдзелю гласали и за членох Ради Вуковарско-сримскей жупаниї. Право виберац мали тисяч 477 уписани до виберацкого списку, а на гласанє вишли 241, лєбо 16,32 одсто.

До нового составу Ради вибрани Борис Бучко, Зденко Бурчак, Йоаким Дудаш, Марияна Джуджар, Яким Ерделї, Звонимир Ерделї, Михал Шайтош, Мирослав Гайдук, Златко Гирйовати, Наталия Гнатко, Петар Киш, Марина Колбас, Мирослав Колбас, Звонимир Колбас, Звонко Костелник, Желько Костелник, Деян Лїкар, Любица Мудри,  Ярослав Медєши, Славко Ждиняк, Томислав Рац, Витомир Мудри, Мария Такач и Звонко Рац.

Як и при Општинскей ради у Петровцох, так и ту остатнї двоме кандидати маю исте число гласох и хто з нїх будзе член Жупанийскей ради Руснацох, конєчну одлуку принєшу одвитуюци державни орґани.

Пошвидко би мал буц отримани и вибор руководзацих целох у шицких радох, та з роботу годни почац такой после рочних одпочивкох.

Орґанизация виберанкох нє була найлєпша, найвекше число жительства нє було достаточно информоване з термином їх отримованя, виберанки нє провадзел нїяки пропаґандни материял, так же и то причина малей виходносци на виберанки на уровню держави.

(конєц) дюлї