I Petrovčane u Noci muzejoch

 

И Петровчанє у Ноци музейох
И Етноґрафска збирка Руснацох у Петровцох, пияток, 28. януара, участвовала у манифестациї "Ноц музейох”, котра по седмираз отримана у вецей як 70 горватских варошох и 150 музейох, ґалерийох и културних установох. Петровци у "Ноци музейох" участвовали першираз, а у орґанизациї Союзу Руснацох и Українцох Републики Горватскей и Ради рускей националней меншини Вуковарско-сримскей жупаниї.
 

З тей нагоди, у рамикох „Ноци отворених дзверох Етноґрафскей збирки“ у Петровцох, Агнетка Балатинац зоз школскима дзецми пририхтала кратку пригодну програму, а числених госцох и домашнїх привитали руководитель Збирки Петро Киш и предсидатель Ради рускей националней меншини Вуковарско-сримскей жупаниї Яким Ерделї.
 

О снованю Збирки и зазберованю експонатох бешедовал др Томислав Мишир, єден з вельких ентузиястох и любительох нашей култури. О нєшкайшим стану Збирки, хтора ма вецей як 500 експонати, присутних упознал Гавриїл Такач. Домашнї парох, о. Владимир Седлак, бешедовал о святих сликох и о других прикраскох хтори ше находза по наших церквох. Жени з Петровцох за тоту нагоду напекли вшелїяки стародавни єдла, а цали час, чопнаре присутних служели з чаю, вареним вином и палєнку.
 

(конєц) дюл