In memoriam - Umar vladyka križevski y mire Slavomir

 
ИН МЕМОРИАМ - Умар владика крижевски у мире Славомир
Вчера на 12 годзин, у новосадским шпиталю, у своїм 77. року живота упокоєл ше преосвящени кир Славомир Микловш, владика крижевски у пензиї.

Владика Славомир народзени у Дюрдьове 16. мая 1934. року, дзе закончел и основну школу. Богословию студирал у Заґребе, а 7. юлия 1964. року є пошвецени за священїка у своїм родзеним  валалє.

Перше место службованя му було у Руским Керестуре, дзе бул капелан од 1964. по 1968. рок, одкаль одходзи за пароха до Вуковару.

З Вуковару є меновани за духовнїка у нашей грекокатолїцкей семинариї у Заґребе, дзе виховал велї ґенерациї богословох, а источашнє бул и епархиялни канцлер.

За владику Крижевского владичества о. Славомир Микловш пошвецени 25. марца 1983. року у Руским Керестуре, и тоту службу окончовал 26 роки, кед 2009. року пошол до пензиї.

У тим чаше, владика вельо зробел на шицких польох у своєй епархиї, а мож визначиц же, медзи иншим, за священїкох пошвецел 40 богословох. За священїкох пошвецел и  43 богословох у Прешовским владичестве, у Словацкей, у чаше док там нє було владики.

Преосвящени владика кир Славомир Микловш будзе поховани на соботу,  23. юлия, на 13 годзин у Катедралней церкви св. оца Миколая у Руским Керестуре, односно у нововибудованей крипти за владикох при церкви.

За упокоєного владику Славомира, исти дзень, на соботу, Заупокойна Служба Божа з обрядом одпитованя будзе служена и у його родним Дюрдьове, з початком на 9 годзин.

(конєц) маф