Interpelácia na Svetozára Čipliča ohľadom zmenšenia dotácie pre Rusínov v Srbsku

 

Посланїцке питанє о зменшаню средствох
 

Рутенпрес обявює посланїцке питанє народней посланїци Олени Папуґовей и подпредсидательки Националного совиту Руснацох, котре поставела министрови за людски и меншински права Светозарови Чипличови, пре нєдавне зменшанє средствох за роботу Националного совиту Руснацох, а котре вчера од Папуґовей сцигло на адресу Рутенпресу:

- З нагоди одлуки Министерства за людски и меншински права, по хторей средства за дїялносц Националного совиту рускей националней меншини у октобру 2010. року зоз 562.920,00 зменшани на 398.050,00 динари (зменшанє средствох за октобер виноши 164.870,00 динари), реаґовала сом з писменим поставяньом посланїцкого питаня министрови Светозарови Чипличови, на основу члена 204. Дїловнїка о роботи Народней скупштини Републики Сербиї.
 

- У обгрунтованю наведзене же у априлу 2009. року Националному совиту рускей националней меншини, Министерство за людски и меншински права уплацело 790.613,00 динари, а под час 2009. року, просеково уплацоване по 562.920,00 динари мешачнє. У периодзе януар-септембер 2010. року Министерство просеково уплацовало 562.920,00 динари, а без даякого обгрунтованя, за октобер того року уплацене 398.050,00 динари.
 

- Средства хтори дотераз були уплацовани, думам ту на 562.920,00 динари, нє були достаточни за финансованє штирох облацох хтори предвидзує Закон о националних совитох националних меншинох, алє ше мало у оглядзе економску ситуацию у держави. Велї активносци загашени, або средства за нїх зведзени на минимум. З тим зменшаньом за октобер, нє годно ше вифинансовац порядни активносци у образованю, пестованю язика, роботи наших КУД...
 

- Член 20. Устава Републики Сербиї прецизує же "досцигнути уровень людских и меншинских правох нє мож зменшовац", а з тим поцагом, праве поробене тото же меншински права зменшани, бо ше пре зменшани средства нє годно вифинансовац роботу Националного совиту - гвари Папуґова, дополнююци то и з питаньом министрови же "кеди Национални совит рускей националней меншини достанє достаточно средства за свойо функционованє од Вашого министерства".
 

- Проблем зоз зменшанима средствами за октобер 2010. року нє ма лєм руски национални совит, алє шицки 19 совити хтори нєдавно формовини и вибрани. Роздумуюци цо окрем того посланїцкого питаня треба поробиц, думам же национални совити пошвидко муша формовац "совит националних совитох", хтори будзе составени з представительох шицкох националних совитох, хтори направя стратеґию наступаня пред державнима орґанами - гвари Олена Папуґа у своїм посланїцким питаню министрови Светозарови Чипличови, а котре придате и предсидательки Народней скупштини РС Славици Дюкич Деянович.