Jaroslav Sabol novým predsedom Narodnej rady Rusnákov

Ярослав Сабол нови подпредсидатель Националного совиту Руснацох

КУЛА, 28. новембер 2006. (Рутенпрес) - На своєй порядней, Петнастей схадзки, котра 25. новембра отримана у Кули, Национални совит рускей националней меншини за нового подпредсидателя Совиту вибрал Ярослава Сабола зоз Нового Саду, котри будзе задлужени за обласц информованя.

До кадрових пременкох у Националним совиту пришло пре писмене задзекованє члена Совиту, источасно и подпредсидателя задлуженого за обласц информованя - Янка Хоми зоз Нового Саду. З оглядом же спрам Статуту, состав Националного совиту нєпременлїви, Национални совит рускей националней меншини убудуце будзе мац седемнац членох.

Янко Хома поднєсол задзекованє и на членство у Управним одборе НВУ "Руске слово" Нови Сад, чий бул и предсидатель. Задзекованє на членство у Управним одборе "Руского слова" дал и член Националнолго совиту Мирослав Чакан зоз Дюрдьова. Место нїх, до Управного одбору НВУ "Руске слово", Национални совит всоботу вибрал новинарох-редакторох у руских редакцийох Радио-телевизиї Нови Сад Златицу Няради и Мирка Канюха.

Место Златици Няради, до Надпатраюцого одбору НВУ "Руске слово", нови член будзе вибрани на шлїдуюцей схадзки. Як гварене на соботовей схадзки, тоти задзекованя ознова отвераю тему о роботи Управного одбора "Руского слова", як и о самей стратеґиї у роботи тей нашей новинско-видавательней установи, котрей снователь Национални совит.

На Петнастей схадзки Национални совит розподзелєл 200 000 динари зоз остатнього конкурса Покраїнского секретарията за предписаня, управу и национални меншини, КУД и орґанизацийом котри поднєсли прияви на конкурс.

На конкурс сцигли 19 прияви, та 90 000 динари достанє Дом култури Руски Керестур, за трошки орґанизованя КМ "Костельникова єшень", а 30 000 динари КПД "Дюра Киш" зоз Шиду, за видаванє Зборнїка "Три ювилеї".

По 15 000 динари достаню Дружтво за руски язик, литературу и културу (за набавянє компютера); Руска матка (за набавянє опреми); Дружтво Руснацох у Суботици за видаванє ЦД-а зоз рускима шпиванками, як и руске КУД "Др Гавриїл костельник" зоз Кули, за видаванє етномузичного ЦД-а.

По 10 000 динари достаню новосадске РКПД за означоавнє 60-рочнїци од свойого формованя, як и Руска матка, за видаванє свойого Глашнїка "Руснак".

(конєц) зам