Jedenasty kongres budze u juniju u Budapeštu

Єденасти конґрес будзе у юнию у Будапешту
Єденасти Шветови конґрес (ШК) Руснацох/Русинох/Лемкох (РРЛ) и Пияти Форум младих РРЛ, будзе отримани од 16. по 18. юний у Будапешту, у Мадярскей, утвердзене на остатнєй схадзки Шветовей ради (ШР) РРЛ, хтора внєдзелю, 22. мая, отримана у городзе Ґеделе, у Мадярскей.

Под предшедованьом предсидателя ШР РРЛ Дюру Папуґу, на Осмей схадзки Ради присуствовали єй члени - зоз Сербиї, Мадярскей, Горватскей, Румуниї, Польскей, Словацкей, Ческей, з Подкарпатя, з України, як и представитель Форуму младих, крем представителя Русинох зоз Сиверней Америки.

Рада утвердзела же кажда орґанизация-членїца Конґресу, може мац до 10 делеґатох и до пейцох госцох на Конґресу, а членїца Шветового Форуму младих РРЛ, до пейц делеґатох. Як то було и за скорейши, и за тот Конґрес предсидатель Шветовей ради ма право и окреме поволац ище до 10 госцох. Термин за приявйованє делеґатох и госцох по 31. май.

На отверанє Єденастого ШК, попри представительох Влади Мадярскей, буду повoлани и представителє амбасадох зоз жемох учашнїцох Конґресу, котри робя у Мадярскей, догварене на схадзки Ради.

Конґрес будзе мац два пленарни зашеданя, на хторих буду винєшени звити о дворочней роботи (медзи двома Конґресами), будзе отримана дискусия по звитох, прилапени нови Статут Конґресу, як и вибор новей Шветовей ради.

Медзи пленарнима, буду зашедац шейсц Конґресни комисиї, утвердзене на схадзки Ради, а одредзени и їх предсидателє, дзе пейцом комисийом, предсидателє буду спред Рускей матки, зоз Сербиї, а єдней з Польскей.

Понеже сполнєла шицки формални условия, можлїве же до членства Конґресу, на зашеданю у Будапешту будзе прията реґионална дружтвена орґанизация - Русинске “землячество” (краянох) “Карпатска Рус” з Москви, з Русийскей федерациї.

Шветови форум младих будзе робиц лєм у пленуму, 17. юния, утвердзене на Ради, дзе бешедоване и о провадзацей, културно-уметнїцкей програми Конґресу, за хтору ше, з найвекшей часци остараю домашнї, алє будзе и учашнїкох з других жемох. 

Як заключене на остатнєй схадзки Ради, на основи скорей придатей вимоги до орґанох парламенту України, предсидательови України будзе послати допис з вимогу о припознавяню Русинох як окременй народносци у України и оможлївйованє же би ше так и вияшньовали на будуцим попису жительства у тей жеми.

(конєц) зам