Jedno žvidaňja...

...do Janka Lypyňskoho, delegata 10. Svitovoho kongresu Rusyňiv (SKR) za Sloveňsko

Mate za sobov dalšyj Svitovyj kongres Rusyňiv. Z čoho mate najvekšu radisť, što vas najvecej oslovylo?

Kongres je samo sobov velykov poďijov a vyberati, hledati najmicniše vražiňja ne je lehke. Ale paru momenťiv bylo pro mene barz cinnych.

Po perše by skladam hluboku poklonu pered organizatorami kongresu, Rusynami z Chorvatska, ale holovňi zo Serbska. Tak jak sja jim zdarylo pryrychtuvati kongres, to ne može byti lem o hrošach, organizačnim talenťi, ale peredvšytkim o serci. A to nam dakus odkryli, kid sme blyže spoznali jak majut organizuvanu školsku nauku, od osnovnoj školy až po univerzitu, jak pracuje ich samouprava, kulturny spolky, čuli zme „bešedovac“ ďiti, ľjudi na ulici, v obchoďi, reštauranti, v cerkvi a to všytky v štati, kotryj lem nedavno byl vo vojnovim konflikti, de ekonomicka situacija nutyt veľjo rodyn hledati soj nove misce pod soncom. Spoznali zme hordych, krasnych ľjudi zvjazanych mocnym putom z rusyňskov hrudov i doľov. Lučili zme sja z nyma zo smutkom na serci, ale velykov naďijov, že najdeme sposib jak sja z nymi stričati najčastiše i naberati od nych entuziazmus i energiju. Takych Rusyňiv nam treba vychovati aj tu doma, v rodynach, v cerkvi i školi. Viďili zme šumnyj pryklad toho, že byti hordym Rusynom a byti aj hordym na svij štat - ne je v konflikťi.

Jak znate miži Sloveňskov asociaciov rusyňskych organizaciji (SARO) a Rusyňskov obrodov na Sloveňsku (ROS) byl permanentnyj konflikt. Teper malo SARO vysylati svojoho člena do Švitovoj rady Rusyňiv. Dočekali sme sja velykoho prekvapiňja, kid predseda SARO o. František Krajňjak sja zvernul do nas z propozycijov, že sja SARO vzdavat na chosen ROS miscja vo Svitovi raďi Rusyňiv, z ciľjom eliminuvati pnuťja i spojity syly pered perepysom naseleňja v roku 2011. Pryjali zme toto velyke gesto, jak akt podanoj ruky a obicjali zorganizuvati v kurťim časi striču reprezentaťiv všytkych rusyňskych organizaciji na Slovensku. Treba nam hledati sposib efektivnoj kooperaciji i podilyti soj robotu na chosen rusyňstva na Sloveňsku. Može dozrivat čas, zavesti volebnyj sposib dobyvaňja mandatu pro reprezentantuvaňja Rusyňiv Sloveňska.

Bars jem sja poťišyl, že Martin Karaš, z OZ molody.Rusyny sja stal predsedom Svitovoho fora molodych Rusyňiv. Naše Združiňja inteligenciji Rusyňiv Sloveňska sa mocno angažuvalo i pidporuvalo vynyknuťja toj organizaciji, takže jem ten akt bral aj jak reakciju na našu robotu.
Tišylo ňja viďiti jak soj molody Rusyne rozumyli, taka atmosfera naisto prynese svoji pozitivny rezultaty.

-lb-