Joakim Erdeľi i Slavko Rac podpisali protokol o sotrudňictve

Яким Ерделї и Славко Рац подписали протокол о сотруднїцтве
Историйна хвилька за Руснацох з двох бокох Дунаю
Предсидатель Националного совиту Руснацох Славко Рац и предсидатель Координациї рускей националней меншини у Републики Горватскей Яким Ерделї всоботу, 25. мая, у Вуковаре подписали Протокол о сотруднїцтве пре очуванє идентитету рускей националней меншини у двох державох.
 
Подписованє Протоколу орґанизоване на Дзень Руснацох у Републики Горватскей, а после вецейрочних пририхтованьох и догваркох, хтори почали ище под час другого зволаня Националного совоту (НС) Руснацох, хторому бул на чолє Славко Орос. Пред соботовим урядовим подписованьом, текст Протоколу перше прилапела Координация рускей националней меншини у Републики Горватскей, а потим, 19. марца и Национални совит Руснацох.
 
Обидва боки визначели же то историйна хвилька за Руснацох з двох бокох Дунаю, котри нєшка жию у двох державох, а Протокол оможлїви найцеснєйши вязи у шицких обласцох значних за очуванє и розвой нашей националней заєднїци у Сербиї и Горватскей и медзисобне спомаганє.
 
Попри чолних особох двох спомнутих целох, на подписованю Протоколу у Вуковаре спред домашнїх присуствовали подпредсидатель Координациї рускей националней меншини мр Ириний Мудри, котри Представнїк Руснацох Городу Заґребу, членїца Координациї и Представнїца Руснацох Осиєцко-бараньскей жупаниї Агнетка Костелник Балатинац, Борис Бучко, подпредсидатель Рускей ради Вуковарско-сримскей жупаниї, хторей на чолє спомнути Ерделї, секретар Координациї Марияна Джуджар, подпредсидатель НС Руснацох Дюра Винаї, предсидатель Вивершного орґану НС Йовґен Мудри, член НС Михайло Зазуляк, та медиї з Горватскей и Сербиї.
 
Як наглашене, пошвидко будзе виробени и план конкретних активносцох на запровадзованю Протоколу у пракси, на хасен обидвох бокох, односно Руснацох у Горватскей и Сербиї.